काठमाडौं । नेपाल उद्योग परिसंघ र नेपालका लागि दक्षिण कोरियाका राजदूत पार्क तइयोङबीच लगानी एवं व्यावसायिक सम्बन्ध विस्तारलगायत विषयमा छलफल भएको छ । 

बुधबार भएको छलफलमा परिसंघ अध्यक्ष राजेशकुमार अग्रवालले दुई देशबीचको कूटनैतिक सम्बन्ध स्थापित भएको ५०औँ  वर्ष पुगेकै दिन भएको यो छलफल अत्यन्त सुखद र महत्त्वपूर्ण भएको बताए । छलफलका क्रममा अध्यक्ष अग्रवालले कोरियाली लगानीकर्ताहरूलाई नेपालमा भौतिक पूर्वाधार, सूचना प्रविधि, पर्यटन,  जलविद्युत्, कृषिलगायत क्षेत्रमा लगानी विस्तारका लागि पहल गर्न राजदूत तइयोङलाई आग्रह गरे । 

सरकारले वैदेशिक लगानी आकर्षित गर्न विद्यमान केही कानुनहरूमा संशोधन समेत गरिसकेको प्रसंग जोड्दै अग्रवालले नेपाल लगानीका लागि राम्रो गन्तव्य रहेको बताए । 

दक्षिण कोरिया नेपाली श्रमिकका लागि आकर्षक गन्तव्य बन्दै गइरहेको बताउँदै नेपाली श्रमिकहरूले कोरियामा सिकेको सीप नेपालमा उद्यमशिलताका साथै समग्र आर्थिक विकासमा सहयोगी बन्ने विश्वास व्यक्त गरे । उनले सीप विकासका क्षेत्रहरूमा समेत लगानी गर्न आग्रह गरे । परिसंघले आगामी सेप्टेम्बरमा आयोजना गर्न लागेको ‘नेपाल पूर्वाधार सम्मेलन २०२४’मा कोरियाबाट उल्लेख्य लगानीकर्ताहरूको सहभागिताका लागि राजदूत तइयोङसँग आग्रह गरे ।

राजदूत पार्क टेइ योङले परिसंघले सञ्चालन गरेको ‘मेक इन नेपाल स्वदेशी अभियान’को प्रशंसा गर्दै यस्ता अभियानहरूले मुलुकको उत्पादन, उत्पादकत्व तथा रोजगारी प्रवर्द्धन गर्दै आयात प्रतिस्थापनमा उल्लेख्य योगदान पुर्‍याउने बताए । राजदूत तइयोङले कोरियाको श्रम बजारमा उल्लेख्य उपस्थिति रहेको बताउँदै नेपालीहरू मेहनती तथा इमान्दार भएको बताए । उनले मुलुकमा उत्पादन हुने वस्तु तथा सो वस्तु उत्पादन हुन प्रयोग हुने कच्चा पदार्थ र अर्ध तयारी वस्तुहरूमा भन्सार दरमा भिन्नता हुनुपर्ने विचार व्यक्त गरे ।

नेपालको आर्थिक विकासमा आवश्यक सहयोग पुग्ने विषयहरूमा दक्षिण कोरिया सदैव सकारात्मक रहेको उनले बताए ।