![जुवातास खेलिरहेको अवस्थामा काठमाडौं र ललितपुरबाट १४ जना पक्राउ](https://12khari.top/uploads/posts/tas baramad pakrau damak1627740766.jpg)
काठमाडौं । जुवातास खेलिरहेको अवस्थामा काठमाडौं र ललितपुरबाट सोमबार १४ जना पक्राउ परेका छन् । काठमाडौंबाट आठ र ललितपुरबाट ६ जनालाई प्रहरीले नियन्त्रणमा लिएको हो ।
काठमाडौंको बत्तीसपुतलीमा जुवातास खेलिरहेको अवस्थामा रामेछापको गोकुलगंगा गाउँपालिका–६ का ४० वर्षीय उमेश सुनुवारसहित आठजना पक्राउ परेका हुन् । सुनुवारले भाडामा लिएको घरमा जुवातास खेलिरहेको अवस्थामा सोमबार दिउँसो उनीहरूलाई पक्राउ गरिएको प्रहरीले जनाएको छ ।
नगद दुई लाख ५२ हजार ५७५ रुपैयाँ र १२ बुक ताससहित उनीहरूलाई पक्राउ गरिएको प्रहरी प्रधान कार्यालयले जानकारी गराएको छ ।
यस्तै, ललितपुर महानगरपालिका–२५, फूलबारीमार्गस्थित सुर्खेती सेकुवा कर्नर होटेलमा जुवातास खेलिरहेको अवस्थामा ६ जना पक्राउ परेका छन् । पक्राउ पर्नेमा मकवानपुरको थाहा नगरपालिका–१२ घर भई ललितपुरको भैँसेपाटीमा बस्दै आएका ३० वर्षीय श्याम तामाङसहित ६ जना छन् ।
नगद ४८ हजार २७० रुपैयाँ र ६ बुक ताससहित सोमबार दिउँसो उनीहरूलाई पक्राउ गरिएको प्रहरीले जनाएको छ ।