दमौली । तनहुँको दमौलीस्थित बुल्दीखोलामा शनिबार आयोजित बृहत् सरसफाइ अभियानमा नेपाली सेनाको टोलीले एक हजार केजीभन्दा बढी फोहर संकलन गरी पहिलो भएको छ ।

युवा अभियन्ता सुदीप गफ्फारको सक्रियतामा सञ्चालित सरसफाइ अभियानमा धेरै फोहर संकलन गर्ने व्यास नगरपालिका–५, चापाघाटस्थित कालीभञ्जन गण (इ)लाई पुरस्कृत गरियो ।

व्यास–१, करङकाठदेखि व्यास–३, सेतीबुल्दी दोभानसम्म भएको सरसफाइ अभियानमा सेनाले एक हजार २४ किलो फोहर संकलन गरेको थियो । यस्तै, व्यास–२ स्थित पुलजीप टोल विकास संस्थाले ९४०.७ किलो फोहर संकलन गरी दोस्रो स्थान हासिल गरेको छ ।

पहिलोलाई नगद १० हजार र प्रमाणपत्र र दोस्रो भएको समूहलाई पाँच हजार र प्रमाणपत्र प्रदान गरिएको छ । रासस