काठमाडौं । भारतीय फुटबल महासंघ (एआईएफएफ)का कार्यसमिति सदस्य तथा हिमाचल प्रदेश फुटबल संघका महासचिव दीपक शर्मा पक्राउ परेका छन् । हिमाचलका दुई महिला खेलाडीले महासचिव दीपकले मद्यपान गरेर आफूहरूमाथि कुटपिट गरेको भन्दै प्रहरीमा उजुरी दिएपछि उनलाई गोवा प्रहरीले पक्राउ गरेको हो ।

घटनाबारे दुई महिला खेलाडीले एआईएफएफमा पनि उजुरी दर्ता गराएका छन् । यी दुवै खेलाडी हाल गोवामा जारी इन्डियन वुमन्स लिग–२ मा खाद एफसीबाट खेलिरहेका छन् ।

महासचिव शर्माले भने खेलाडीले लगाएको आरोप निराधार भएको बताएका छन् । “यी सबै निराधार आरोप हुन् । कसैले उनीहरूलाई भड्काइरहेका छन् र यसलाई त्यसै मुद्दा बनाउने प्रयास गरिरहेका छन् । उनीहरू राति ११ बजे अन्डा लिएर आइरहेका थिए, यसै विषयमा मैले उनीहरूलाई गाली गरेको मात्रै हो । यो सामान्य विषय थियो,” शर्माले भने ।

एआईएफएफका अध्यक्ष कल्याण चौबेले यो विषयलाई महासंघले गम्भीर रूपमा लिने बताएका छन् ।