काठमाडौं । एफसी चितवन सुपर लिग (एनएसएल) तेस्रो संस्करणमा पहिलो जित निकाल्ने टिम बनेको छ ।

चितवनले सोमबार त्रिपुरेश्वरस्थित दशरथ रंगशालामा सम्पन्न खेलमा पोखरा थन्डर्सविरुद्ध २–० को जित निकालेको थियो । चितवनको जितमा नोदिर माभ्लोनोभ र निरज चौधरीले गोल गरे । चितवनले पहिलो र दोस्रो हाफमा समान एक गोल गरेको हो ।

खेलको १६औँ मिनेटमा माभ्लोनोभले गरेको गोलमा चितवनले अग्रता बनाएको थियो । यस्तै, इन्जुरी समयमा निरजले चितवनको अग्रता दोब्बर बनाए ।

यो जारी सिजनको पहिलो जित हो । यसअघि शनिबारदेखि सुरु भएको प्रतियोगिताको पहिलो र दोस्रो खेल बराबरीमा समाप्त भएको थियो । प्रतियोगिताको पहिलो खेलमा साविक विजेता ललितपुर सिटी एफसी र काठमाडौं रेजर्सबीचको खेल २–२ को बराबरीमा समाप्त भएको थियो । यस्तै, दोस्रो खेलमा बुटबल लुम्बिनी एफसी र झापा एफसीले गोलरहित बराबरी खेल्दै अंक बाँडेका थिए ।