काठमाडौं । लायन्स क्लब नेपाल ‘डिस्ट्रिक ३२५ एम’को आयोजनामा प्रथम लायन्स भलिबल प्रतियोगिता हुने भएको छ । सोमबार लायन्स क्लब नेपाल ‘डिस्ट्रिक ३२५ एम’ले पत्रकार सम्मेलन आयोजना गरी नेपालसहित दुई विदेशी भलिबल टिम सम्मिलित अन्तर्राष्ट्रियस्तरको पुरुष भलिबल प्रतियोगिता आयोजना गर्न लागेको जानकारी दिएको हो ।

आयोजकका अनुसार, प्रतियोगिता यही आउँदो वैशाख १८ देखि २२ गतेसम्म पोखरास्थित मल्टिप्रपोज हलमा हुनेछ । प्रतियोगितामा नेपालका तीनवटै विभागीय क्लब र गण्डकी प्रदेश भलिबल संघसहित पाकिस्तान भलिबल संघ र अन्य एक विदेशी टोली गरी ६ वटा टिमले सहभागिता जनाउने बताइएको छ । एक विदेशी टोलीका लागि भारत र इरानसँग छलफल भइरहेको आयोजकले जनाएको छ ।

प्रतियोगिताको अनुमानित बजेट ८० लाख रुपैयाँ रहेको छ । प्रतियोगिताको प्रथम विजेतालाई चार लाख ४४ हजार ४४४ रुपैयाँ, प्रमाण पत्र, ट्रफी र मेडल प्रदान गरिनेछ । दोस्रो हुने टोलीले दुई लाख ४४ हजार ४४४ रुपैयाँ, प्रमाण पत्र, ट्रफी र मेडल  र तेस्रो हुनेले एक लाख ४४ हजार ४४४ रुपैयाँ दिइनेछ । उत्कृष्ट खेलाडीले नगद १४ हजार ४४४ रुपैयाँ, प्रमाण पत्र, ट्रफी र मेडल र विधागत पुरस्कारमा खेलाडीहरूले आठ हजार ४४४ रुपैयाँ पाउनेछन् ।

लिग कम नकआउट प्रणालीमा खेल सञ्चालन हुनेछ । ६ वटा टोली सहभागी हुने यो प्रतियोगितामा कुल ९ वटा खेल हुनेछ । प्रतियोगिताको टिकट मूल्य ३०० रुपैयाँ रहेको छ । आयोजकले खेलअनुसार टिकट मूल्य एक हजारसम्म बढ्न सक्ने जनाएको छ ।