काठमाडौं । विश्व स्क्वास वरीयतामा पाँचौँ स्थानमा रहिसकेका बोर्खा गोलान नेपाली खेलाडीलाई प्रशिक्षण दिने भएका छन् ।

नेपाल स्क्वास एन्ड र्‍याकेट्स संघले सोमबार एक कार्यक्रमको आयोजना गर्दै स्पेनका लेभल थ्री प्रशिक्षक गोलानलाई स्वागत गरेको छ ।

गोलानले एक हप्ता नेपाली स्क्वास खेलाडीलाई प्रशिक्षण दिनेछन् । सन् २०१४ मा गोलान विश्व स्क्वास वरीयतामा पाँचौँ स्थानमा थिए । उनले पिएसए विश्व टुरमा ३३ उपाधि जितेका छन् । 

यसैगरी उनी १७ पटकको स्पेनका राष्ट्रिय च्याम्पियन पनि हुन् । दुईपटक युरोपेली इन्डिभजुयल च्याम्पियन रहिसकेका गोलानले स्पेनको राष्ट्रिय टिमलाई विभिन्न अन्तर्राष्ट्रिय प्रतियोगतामा नेतृत्व पनि गरेका छन् । 

सन् २०२३ मा गोलानले खेलाडी जीवनबाट सन्यास लिए । त्यसपछि उनले गोलान स्क्वास एकेडेमीको स्थापना गरे । जुन एकेडेमीले युवा खेलाडी उत्पादन र सहयोग गर्ने गर्दछ । 

सोही एकेडेमीमा नेपालका स्क्वास खेलाडी अमृत थापा मगर पनि प्रशिक्षणमा छन् । ४२ वर्षीय प्रशिक्षक गोलानले नेपालको बारेमा धेरै सुनेको बताउँदै आफूले नेपाली स्क्वास खेलाडीलाई थप उत्प्रेरित गर्ने लक्ष्यसहित नेपालका आएको बताए । 

“पछिल्ला दुई–तीन वर्षदेखि प्रशिक्षकको जिम्मेवारीमा छु, नेपालमा सिकाउने मात्र होइन, मैले पनि धेरै सिक्ने अवसर पाउनेछु,” गोलानले भने । 

नेपाल स्क्वास एन्ड राकेट्स संघका अध्यक्ष ध्रुवबहादुर गुरुङले गोलानको प्रशिक्षणले नेपाली स्क्वास खेलाडीको स्तर अझ राम्रो हुने भनाइ राखे । उनले गोलान स्क्वास फाउन्डेसनबाट युरोपका स्तरीय खेलाडीसँग अनुभव दिन नेपाली खेलाडीलाई स्क्वास टुरको व्यवस्था गर्न पनि अनुरोध गरे । 

ललितपुर जिल्ला खेलकुद विकास समितिका अध्यक्ष विनोद महर्जनले गोलानको आगमन नेपालका स्क्वास खेलाडीका लागि आफ्नो खेल स्तर बढाउने ठूलो अवसर भएको बताए । 

उनले हेटौँडामा सक्वास कोर्ट बनाउने योजना सामेल प्रपोजको कार्य अगाडि बढेको जानकारी दिए । 

यसैगरी नेपाल स्क्वास एन्ड र्‍याकेट्स संघका निवर्तमान अध्यक्ष किशोर महर्जनले गोलानबाट खेलाडी मात्र नभएर नेपाली प्रशिक्षकले पनि धेरै कुरा सिक्ने अपेक्षा गरे ।