काठमाडौं । कप्तान लियोनल मेसीको दुई गोलप्रेरित इन्टर मियामीले मेजर लिग सकर (एमएलएस)मा नास्भिलविरुद्ध ३–१ को जित निकालेको छ ।

आइतबार बिहान घरेलु मैदान चेज रंगशालामा मियामीलाई जित दिलाउन मेसीले दुई र अर्को एक गोल सर्जियो बुस्केटले गरे । नास्भिलले मियामीका फ्रान्को नेग्रीबाट आत्मघाती गोल उपहार पाएको थियो ।

खेलको दोस्रो मिनेटमा नै नेग्रीको आत्मघाती गोलमा नास्भिलले अग्रता बनाएको थियो । तर, ११औँ मिनेटमा मेसीले गोल गर्दै घरेलु टिमलाई बराबरीमा ल्याए । ३९औँ मिनेटमा बुस्केटले गोल गरेपछि मियामीले पहिलो हाफमा २–१ को अग्रता बनाएको थियो ।

खेलको निर्धारित समय सकिन नौ मिनेटअघि प्राप्त पेनाल्टीलाई मेसीले नै सदुपयोग गरेपछि मियामीले ३–१ को जित पक्का गरेको हो ।

जितसँगै १० खेलबाट १८ अंक जोडेको मियामी इस्टर्न कन्फेरेन्सको शीर्ष स्थानमा छ । आठ खेलबाट सात अंकको नास्भिल तालिकाको १४औँ स्थानमा छ ।