काठमाडौं । संयुक्त अरब इमिरेट्स (यूएई)मा आएको बाढीले त्यहाँका प्रमुख राजमार्ग र अन्तर्राष्ट्रिय विमानस्थल पानीले भरिएका छन् । भीषण आँधीबेहरीपछि त्यहाँ डेढ वर्षभन्दा बढी अवधिमा हुने वर्षा केही घण्टामै भएको छ ।
दुबई अन्तर्राष्ट्रिय विमानस्थलका अनुसार त्यहाँ सोमबार अपराह्नपछि २० मिलिमिटर वर्षा भएको छ । मंगलबार बिहान स्थानीय समयअनुसार करिब ९ बजे आँधी तीव्र भएर दिनभर जारी रहेको बताइएको छ । त्यसपछि थप वर्षा र असिना परेको थियो ।
मंगलबारको अन्त्यसम्ममा दुबईमा १४२ मिलिमिटर वर्षा भएको थियो । दुबई अन्तर्राष्ट्रिय विमानस्थलको मौसमसम्बन्धी तथ्यांकअनुसार त्यहाँ औसतमा वार्षिक ९४.७ मिलिमिटर वर्षा हुने गर्छ । विमान अवतरण एवं ट्याक्सीमार्गमा पानी भरिएको थियो । बाढीकै कारण मंगलबार राति विमानस्थलमा आवतजावतमा रोक नै लगाएको थियो ।
बाढीले सडकहरू भरिएर यात्रुहरूलाई टर्मिनलसम्म पुग्न समेत कठिनाइ भएको छ । बाढीका कारण विमानका चालक दलका सदस्यहरू पुग्न नसक्दा उडान प्रभावित भएको विमानस्थलले बुधबार बिहान बताएको छ । इमिरेट्सले दुबई विमानस्थलबाट बुधबार बिहान ८ बजेदेखि रातिसम्मका लागि यात्रुको चेकइन नै रोकेको छ ।
सामाजिक सञ्जाल एक्समा विमानस्थलले सबै स्थिति सामान्य हुन समय लाग्ने बताएको छ । यूएईभरिका विद्यालय बन्द भएका छन् भने सरकारी कर्मचारी र अन्यले आफू भएकै ठाउँबाट काम गरिरहेका छन् । सामान्यतयाः तातो र सुक्खा मौसम रहने खाडी क्षेत्रमा पछिल्ला वर्षहरूमा भारी वर्षाको क्रम सुरु भएको छ ।
यूएईको छिमेकी ओमानमा अधिकारीहरूले बाढीका कारण मृत्यु हुनेको संख्या १८ पुगेको र केही अझै बेपत्ता भएको बताएका छन् । बहराइनमा समेत कारहरू बाढीमा फसेको फोटो एवं भिडियोहरू समाजिक सञ्जालमा राखिएका छन् ।
विश्वको सबैभन्दा ठूलो तेल उत्पादक मध्येको एक यूएईले गत वर्ष जलवायु परिवर्तनसम्बन्धी सम्मेलन कोप २८ को आयोजना गरेको थियो । वैज्ञानिकहरूले यस किसिमको असामान्य मौसमलाई जलवायु परिवर्तनसँग जोडेका छन् । जलवायु परिवर्तन रोक्न नसके पृथ्वीको तापक्रम बढ्दै जाँदा भविष्यमा यस्ता र अझै डरलाग्दा घटना सामान्य हुने उनीहरूको भनाइ छ ।
