काठमाडौं । शिक्षा विज्ञान तथा प्रविधिमन्त्री सुमना श्रेष्ठले विश्वविद्यालयलाई दलीय राजनीतिबाट मुक्त नगरेसम्म शिक्षा क्षेत्रको विकास हुन नसक्ने बताएकी छन् । 

मंगलबार सिंहदरबारस्थित मन्त्रालयमा प्राज्ञिक समूहसँगको भेटमा उनले प्राज्ञिक समूह र प्राध्यापक तथा कर्मचारीहरूले पनि सरकारी सेवामा रहुन्जेलसम्म राजनीतिक दलको सदस्य बन्दैनौँ भन्ने संकल्प गर्न आवश्यक रहेको बताइन् । 

उनले प्राज्ञहरूको विज्ञता, अनुभवलाई आफूले सम्मान गर्ने भन्दै मन्त्री श्रेष्ठले सुझावहरू कार्यान्वयन गर्ने प्रतिवद्धता जनाइन् । उनले शिक्षक, कर्मचारी, राजनीतिक पार्टीको कुनै कार्यकारीमा बस्न नहुने बताइन् । उनले राजनीतिक नेतृत्वसँग भेट्दा पनि राजनीतिक दलको सदस्यता दिन पाउनु हुन्न भनेर खबरदारी गर्न आवश्यक रहेको बताइन् ।