काठमाडौं । अख्तियार दुरुपयोग अनुसन्धान आयोगले ग्रामीण विकास लघुवित्त वित्तीय संस्था लिमिटेडका वरिष्ठ फिल्ड सहायक उदयकृष्ण अधिकारीविरुद्ध भ्रष्टाचार मुद्दा दायर गरेको छ । उनले १९ लाख दुई हजार २३७ रुपैयाँबराबरको सार्वजनिक सम्पत्ति हानिनोक्सानी गरेको दाबी गर्दै शुक्रबार अख्तियारले विशेष अदालतमा मुद्दा दायर गरेको हो ।

अख्तियारले दायर गरेको मुद्दामा अधिकारीसँग १९ लाख दुई हजार २३७ रुपैयाँ बिगो दाबी गरिएको छ । चितवनको टाँडीस्थित ग्रामीण विकास बैंकका कर्मचारीले किर्ते सदस्य बनाई बिनाधितो कर्जा दिएको, ऋणीबाट असुली भएको साँवाब्याज रकम नदेखाई जग्गा खरिदमा प्रयोग गरेको भन्ने उजुरी परेपछि अख्तियारले अनुसन्धान अघि थालेको थियो ।

वरिष्ठ फिल्ड सहायक अधिकारीले १९ लाख दुई हजार २३७ रुपैयाँ हिनामिना गरेको अनुसन्धानका क्रममा पाइएको अख्तियारद्वारा शुक्रबार जारी विज्ञप्तिमा उल्लेख छ ।