काठमाडौं । भारतमा रोजगारीको अवसर देखाउँदै प्रलोभनमा पारेर नेपाली युवतीहरूलाई अवैध धन्दामा लाग्न बाध्य घटना सामान्य बन्दै गएका छन् । तर, पछिल्लो समय दलालहरूले भारत हुँदै तेस्रो मुलुकमासमेत नेपाली युवतीहरूलाई अवैध धन्दाकै लागि पठाउने गरेको खुलेको छ ।
कुवेतमा घरायसी कामका लागि रोजगारीको अवसर देखाउँदै श्रीलंका पुर्याएर यौन धन्दामा लगाउने गरेको तथ्य खुलेको हो । प्रहरीको मानव बेचबिखन अनुसन्धान ब्यूरोको टोलीले नेपाली युवतीलाई श्रीलंका पु¥याएर यौन धन्दामा लगाएको आरोपमा एक जनालाई पक्राउ गरेको छ ।
पक्राउ पर्नेमा रसुुवा नौकुण्ड गाउँपालिका–१ का नुर्वु घले भन्ने नुर्बु स्याङबो छन् । उनी नौकुण्ड गाउँपालिकाकै अध्यक्ष समेत हुन् । ब्यूरोको टोलीले उनलाई बुधबार काठमाडौंबाट पक्राउ गरेको ब्यूरोका एसपी ज्ञानेन्द्रप्रसाद फुयालले जानकारी दिए ।
पक्राउ परेका स्याङबोमाथि ब्यूरोले मानव बेचबिखन तथा ओसार–पसार मुद्दामा काठमाडौं जिल्ला अदालतबाट पाँच दिनको म्याद थप गरेर अनुसन्धान जारी राखेको छ ।
यसरी पुर्याएका थिए श्रीलंका
प्रहरीका अनुसार, नुवाकोटकी २२ वर्षीया योगिता तामाङ (नाम परिवर्तित) रोजगारीका लागि विदेश जाने सोचमा थिइन् । काठमाडौंकै रात्रीकालीन व्यवसायमा काम गर्दै आएकी योगिताको पढाइ सामान्य लेखपढ मात्रै थियो ।
काठमाडौंमा रहँदा उनले आफ्नो दैनिकी चलाउन गाह्रो हुने देखिन् । २०७३ सालको साउनमा भने उनको भेट रसुवाका नुर्बु स्याङबोसँग हुन पुग्यो । योगिताले नेपालमा बसेर केही नहुने भन्दै विदेश जाने सोच बनाएको कुरा नुर्बुलाई सुनाइन् । त्यसबेला उनलाई नुर्बु विदेश पठाउने एजेन्ट हुन् भन्ने थाहा थिएन । योगिताको कुरा सुनेका नुर्बुले कुवेत जाने भए आफैँ पठाई दिने प्रस्ताव गरे ।
योगितालाई ढुंगा खोज्दा देवता भेटेजस्तै भयो । उनले नुर्बुको प्रस्ताव सहजै स्वीकार गरिन् । कुवेत जान तयार भइन् । योगिताका लागि पासपोर्टसमेत नुर्बु आफैँले बनाई दिए ।
नेपालबाट कुवेत जान झन्झट हुने भन्दै नर्बुले योगितालाई भारतको दिल्ली हुँदै जानुपर्ने बताएका थिए । जसरी पनि नेपाल छाड्ने मनिस्थितिमा पुगेका योगिता त्यसका लागि पनि तयार भइन् । उनी साउनमै नुर्बुसँगै दिल्ली पुगिन् ।
दिल्लीबाट श्रीलंकाको ‘भिजिट भिसा’ लगाएका योगितालाई श्रीलंका हुँदै कुवेत पुग्ने बताइएको थियो । योगितालाई होला भन्ने लाग्यो । दिल्लीमा केही दिन बसेकी योगिता श्रीलंकाको कोलम्बोका लागि पर्यटकका रुपमा उडिन् ।
कुवेतमा रोजगारी गर्ने आशाले श्रीलंका पुगेका योगितालाई त्यहाँ पुगेपछि भने नर्क पुगेजस्तै लाग्यो । उनको पासपोर्ट खोसियो । उनीलाई कोठामा थुनी अवैध यौन धन्दाका लागि लगाउन खोजियो ।
उनी बाध्यतामा परिन् । प्रतिकार गर्ने अवस्थामा थिएन । पछि नेपाल प्रहरी र श्रीलंकास्थित अन्य संघ संस्थाको समन्वयमा उद्धार गरिएको थियो । योगिता नेपाल फर्किएलगत्तै नुर्बुकै नाममा प्रहरीमा जोहरी दिएकी थिइन् । तर, उनी लामो सयमसम्म पक्राउ पर्नबाट जोगिँदै आएका थिए ।
अनुसन्धान गर्दै जाँदा खुल्यो पालिका अध्यक्ष
पछिल्लो समय ब्यूरोको टोलीले विभिन्न पुराना उजुरी माथिको फाइल खोतल्न थालेको छ । त्यसैमध्येको एक थियो– योगिताको उजुरी पनि । योगिताको उजुरीका आधारमा अनुसन्धान गर्दै जाँदा पीडित भनिएका नुर्बु नौकुण्ड गाउँपालिकाकै अध्यक्ष रहेको खुल्यो । पालिकाको अध्यक्षबारे ब्यूरोको टोलीले निगरानी गर्दै आएको थियो ।
बुधबार भने उनी ब्यूरोको कार्यालय नजिकै आइपुगेको अवस्थामा टोलीले पक्राउ गरेको हो । ब्यूरोको टोलीसँग सुरुमा उनले किन पक्राउ गर्न खोजेको भन्दै प्रतिकार गर्न खोजेका थिए ।
प्रहरीका अनुसार, केही दिनदेखि निगरानी बढाइएको थियो । उनलाई आफू पक्राउ पर्नेबारे कुनै सूचना समेत थिएन । उजुरी पुरानो भएका कारण पनि उनी ढुक्कजस्तै थिए । तर, हामीले तपाईं ब्यूरो हिँड्नू भन्दा सुरुमा अँटेर गरेका थिए ।
एक वर्षमै २९० महिलाको उद्धार
ब्यूरोको टोलीले चालु आर्थिक वर्षमा मात्रै विभिन्न मुलुकबाट दुई सय ९० महिलाको उद्धार गरेको छ । जसमध्ये सबैभन्दा बढी भारत र दोस्रोमा कुवेतबाट उद्धार भएका छन् । भारतबाट ३३ जना र कुवेतबाट ३१ जनाको उद्धार भएको तथ्यांक ब्यूरोसँग छ ।
त्यसबाहेक युद्धग्रस्त देश इराक र सिरियाबाट समेत उद्धार गरिएको छ । इराकबाट ८ जना र सिरियाबाट २ महिलाको उद्धार भएको छ । त्यस्तै ओमान, दुबई र चीनबाट समेत महिलाको उद्धार गरिएको छ । विभिन्न देशमा रोजगारीको प्रलोभन देखाएर एजेन्टहरूले अवैध कामका लागि भारत हुँदै तेस्रो मुलुक पुर्याउने गरेको ब्यूरोले जनाएको छ ।
