काठमाडौं । राष्ट्रिय प्रजातन्त्र पार्टी (राप्रपा)को प्रदर्शनलाई मध्यनजर गरेर प्रहरीले काठमाडौंको सुरक्षा व्यवस्था कडा पारेको छ । प्रदर्शनका क्रममा घुसपैठ हुन सक्ने भन्दै उच्च सुरक्षा अपनाइएको उपत्यका प्रहरी कार्यालयका प्रमुख एवं एआईजी दीपक थापाले जानकारी दिए ।
प्रदर्शनलाई मध्यनजर गर्दै नेपाल प्रहरी, सशस्त्र प्रहरी बल र राष्ट्रिय अनुसन्धान विभागको संयुक्त कमान्ड पोस्ट राखिएको छ । ‘हामीले शान्तिपूर्ण रूपमा हुने प्रदर्शनमा कुनै बल प्रयोग गर्दैनौँ । तर, प्रहरीमाथि नै आक्रमण हुने गतिविधि र सरकारले तोकेको निषेधित क्षेत्र तोड्ने प्रयास भयो भने सिलसिलेबार बल प्रयोग गर्नुपर्ने अवस्था पनि आउन सक्छ,” एआईजी थापाले बाह्रखरीसित भने ।
सुरक्षाका निम्ति उपत्यका प्रहरी कार्यालय मातहतका सबै १२ हजार प्रहरीलाई तयारी अवस्थामा राखिएको छ । प्रहरी प्रधान कार्यालयबाट समेत थप सहयोग मागिएको छ ।
सशस्त्र प्रहरी बललाई दोस्रो घेरामा राखिएको छ । एसपीको कमान्डमा करिब एक हजारभन्दा बढी जनशक्ति परिचालन गरिएको सशस्त्र प्रहरी बलका डीएसपी एवं सहायक प्रवक्ता शैलेन्द्र थापाले जानकारी दिए ।
राप्रपाले आज प्रदर्शनका क्रममा एक लाख मानिसलाई सडकमा उतार्ने जनाएको छ । सुरक्षाकर्मीको रिपोर्टले भने करिब १० हजार प्रदर्शनकारीको उपस्थिति हुने देखिएको छ ।
निषेधित क्षेत्र तोड्न सक्ने भन्दै प्रहरीले पानीको फोहरा, अश्रुग्यास, रबरका गोलीसहितको टोली परिचालन गरेको छ । प्रदर्शनकारी हिँड्ने रुटमा ड्रोन क्यामेरादेखि उच्च प्रविधिको सुरक्षा उपाय अपनाइने एआईजी थापाको भनाइ छ ।
काठमाडौंका विभिन्न क्षेत्रबाट राप्रपाको जुलुस सुरु भएको छ ।
