काठमाडौं । जस बट्लरको शतकप्रेरित राजस्थान रोयल्यसले इन्डियन प्रिमियर लिग (आईपीएल)मा लगातार चौथो जित निकाल्ने क्रममा रोयल च्यालेन्जर्स बेंगलुरुविरुद्ध ६ विकेटको सहज जित निकालेको छ ।

शनिबार भारतको जयपुरस्थित सवाई मानसिंह रंगशालामा भएको खेलमा बेंगलुरुले प्रस्तुत गरेको १८४ रनको लक्ष्य राजस्थानले १९.१ ओभरमा चार विकेट गुमाएर पूरा गर्‍यो ।

राजस्थानको जितमा बट्लरले १०० रनको अविजित इनिङ खेले । उनले ५८ बलमा नौ चौका र चार छक्का प्रहार गरे । बट्लरले ०–१ को कठिन अवस्थाबाट कप्तान सन्जु सामसनसँग दोस्रो विकेटका निम्ति १४८ रनको साझेदारी गर्दै राजस्थानलाई जित नजिक पुर्‍याएका थिए ।

सामसनले ४२ बलमा आठ चौका र दुई छक्कासहित ६९ रन बनाए । यस्तै, सिम्रोन हेटमायर ११ रनमा अविजित रहे । बेंगलुरुका रिस टोप्लेले दुई विकेट लिए । यस दयाल र मोहम्मद सिराजले समान एक विकेट लिए ।

त्यसअघि विराट कोहलीले शतक बनाएपछि टस हारेर ब्याटिङमा आएको बेंगलुरुले निर्धारित २० ओभरमा तीन विकेट गुमाएर १८३ रनको योगफल खडा गरेको थियो ।

बेंगलुरुका ओपनर कोहलीले ७२ बलमा अविजित १२ चौका र चार छक्कासहित ११३ रन बनाए । कप्तान फाफ डु प्लेसिसले ३३ बलमा दुई चौका र दुई छक्कासहित ४४ रन थपे । राजस्थानका युजवेन्द्र चहलले दुई र नान्द्रे बर्गरले एक विकेट लिए ।

प्रतियोगितामा चौथो जित निकालेको राजस्थान आठ अंकसहित तालिकाको शीर्ष स्थानमा छ । पाँच खेलबाट दुई अंक जोडेको बेंगलुरु तालिकाको आठौँ स्थानमा छ ।