काठमाडौं । “पहिलो बल फ्याँक्नुभन्दा अघि म नर्भस थिएँ । मुटुको चाल बढिरहेको थियो । तर, पहिलो बल फ्याँकिसकेपछि नर्मल भयो,” चोटका कारण दुई वर्ष राष्ट्रिय टिमबाट बाहिरिएका कमलसिंह ऐरीले शुक्रबार आयरल्यान्ड वुल्भ्सविरुद्ध नेपाल ‘ए’बाट पुनरागमन गर्दाको भावना यसरी सुनाए ।

वुल्भ्सविरुद्धको पहिलो ट्वान्टी–२० खेलमा नेपालले टस जितेर फिल्डिङको निर्णय लियो । टिमका कप्तान विनोद भण्डारीले पहिलो ओभर बलिङ गर्ने जिम्मेवारी नै कमललाई सुम्पिए । कमलको पहिलो बलमा आयरल्यान्डका ओपनर रोस अडायरले दुई रन लिए । तर, दोस्रो बलमा उनै अडायरलाई कमलले स्लिपमा आरिफ शेखबाट क्याच गराउँदै पभेलिनको दिशा देखाए ।

विकेट लिएपछि मुठी बनाउँदै हावामा भुइँतर्फ प्रहार गरेका कमलले दुई औँला चुमेर हात उठाउँदै ‘सेलिब्रेसन’ गरे । “धेरै पछि कम्पिटेटिभ क्रिकेट खेलेको हो मैले । सेलिब्रेसन गर्न नपाएको धेरै भइसकेको थियो । त्यो सेलिब्रेसन त्यसै कारण आयो । दोस्रो बलमै विकेट लिँदा धेरै खुसी लाग्यो,” उनले भने ।

दुई वर्षअघि ब्युटि (क्लाभिकल) बोनमा लागेको चोटले मैदानबाट बाहिरिँदा यति लामो समय क्रिकेटबाट पर बस्नुपर्छ भन्ने कल्पनै गरेका थिएनन् उनले । दुई वर्षअघि अर्थात् ०७८ चैत १९ गते मलेसियासँगको खेलका क्रममा काँध र घाँटीबीचको हड्डी भाँचिँदा कमलले तत्कालै मैदान छोडेका थिए ।

मलेसियाविरुद्ध १७औँ ओभरको दोस्रो बलमा आदिलको बलिङमा चोभार इन्डमा एइनुल हाफीले प्रहार गरेको बल बाउन्ड्री लाइनमा डाइभ गरेर रोक्ने क्रममा उनलाई चोट लागेको थियो । चोट गहिरो भएकाले उनलाई तत्काल कलंकीस्थित नेपाल नेसनल अस्पताल पुर्‍याइयो । घटना भएको दोस्रो दिन उनको शल्यक्रिया गरियो । त्यसपछि सुरु भयो कमलका कठिन दुई वर्ष ।

शल्यक्रियापछि ठिक हुन ६ हप्ता लाग्ने भनिए पनि उनी ६ महिना क्रिकेटमा फर्कन नसक्ने चिकित्सकले जानकारी गराए । पहिलो तीन महिना पूर्ण आराम गरेरै बिताए कमलले । त्यसपछिका तीन महिना भने उनले थेरापी सुरु गरे ।

“ब्युटिबोन फ्रयाक्चर भएपछि रिकभर हुन ६ महिना लाग्यो,” कमलले मलेसियाविरुद्धको त्यो चोट सम्झिए, “चोट लाग्दा सुरुमा आरामका लागि केही समय पाएँ भन्ने लाग्यो । तर, समय लामो लामो हुँदै गएपछि क्रिकेटका सबै चिज मिस हुन लागे ।”

६ महिना लामो आरामपछि चोटलाई जितेर उनी पुनः प्रशिक्षणमा फर्किए । पुरानो लयमा फर्कन समय पनि लागेन । सशस्त्र प्रहरी बलको एपीएफ क्लबबाट घरेलु क्रिकेट खेल्ने कमलले प्रधानमन्त्री कपबाट पुनरागमन गरे । गत वर्ष कात्तिक १३ देखि २६ गतेसम्म सञ्चालित प्रतियोगिताको उपाधि कमल आबद्ध एपीएफले नै जित्यो । एपीएफले उपाधि जित्दाका पाँचै खेल खेलेका उनले ११ विकेट लिए । प्रतियोगितामा सर्वाधिक विकेट लिने खेलाडीको सूचीमा उनी छैटौँ स्थानमा रहे ।

कमलको यही प्रदर्शनले राष्ट्रिय टिमसम्मको ढोका पुनः खोल्यो । युनाइटेड अरब इमिरेट्स (यूएई)मा तीन एकदिवसीय खेलको शृंखलाका निम्ति उनी नेपाली टिममा समेटिए । तर, उनले तीनै खेलमा मौका पाएनन् ।

“ब्युटिबोनको चोटपछि पीएम कप खेलेँ । त्यहाँ प्रदर्शन ठिकै थियो । त्यसपछि यूएईसँगको एकदिवसीय शृंखलामा टिममा थिएँ । तर, खेल्न मौका पाइनँ,” कमलले भने ।

त्यसपछि उनले ०७९ पुस ९ देखि २७ गतेसम्म आयोजित नेपाल टी–२० काठमाडौं नाइट्सबाट खेले । उक्त प्रतियोगितामा टिमले खेलेका ११ मध्ये १० इनिङ खेल्दा कमलले १० ब्याटरलाई पभेलियनको दिशा देखाए ।

त्यसपछि उनले राष्ट्रिय टिमको क्याम्पमा प्रशिक्षणको मौका पाइराखे । टिममा भने पर्न सकेनन् । यसै बेला ब्युटिबोनको फ्रयाक्चर ठिक भए पनि कमलमाथि अर्को चोट थपियो । ब्युटिबोनको चोटबाट फर्किएको केही समयपछि नै उनलाई ढाडको दुखाइले सताउन थाल्यो ।

“ब्युटिबोन ठिक भएर फर्किएर केही प्रतियोगिताहरू खेलेँ,” उनले भने, “तर, त्यसको केही समयपछि नै मैले ब्याक इन्जुरी (स्ट्रेस फ्रयाक्चर) फेस गरेँ । यसपछि मैले खेल्न सकिनँ । ब्याक इन्जुरी पनि ६ महिना लाग्यो ठिक हुन ।”

इन्जुरीको समय कठिन थियो । तर, यो समय बितेर जान्छ भन्ने उनमा दृढ विश्वास थियो । त्यस बेला अझै कमब्याक गर्छु, खेल्छु भन्ने बेजोड चाहना थियो कमलमा । यो समयमा नजिकका साथीहरूले उनको हौसलामा कमी आउन दिएनन् । परिवारबाट पनि राम्रो साथ पाए । दाइ किशोरसिंह ऐरीबाट पाएको विशेष साथले क्रिकेटप्रति कमलको लगावमा कमी हुन दिएन ।

“नजिक रहेका सबैले राम्रो साथ दिए । सपोर्टको कमी महसुस भएन त्यो फेजमा,” कमल चोटका दौरान आफूले पाएको साथ उत्साहसाथ सुनाउँछन्, “परिवारमा नखेल भन्ने कोही छैनन् । सबैले खेल्नुपर्छ खेल्नुपर्छ भने । विशेष गरी दाइ किशोरसिंह ऐरीले धेरै गर्नुभयो ।”

सन् २०२० मा कीर्तिपुरमै भएको ओमानविरुद्धको एकदिवसीय क्रिकेटबाट कमलले राष्ट्रिय टिममा ‘डेब्यु’ गरेका थिए । त्यसपछि उनी राष्ट्रिय टिमको नियमित सदस्य बने । तर, चोटले सताउँदा कमललाई छोडेर राष्ट्रिय टिम धेरै अघि बढिसकेको छ । उनले राष्ट्रिय टिममा फर्कने लक्ष्य भने छोडेका छैनन् । उनी अब राष्ट्रिय टिममा आइपरे जिम्मेवारी वहन गर्न तयार पनि छन् ।

“अब राम्रो खेल्दै जाने हो । सिनियर टिममा पर्ने नपर्ने सेलेक्टरहरू छन्,” कमलले भने, “मैले जहाँ अवसर पाएको छु त्यहाँ राम्रो गर्ने हो । टिम (राष्ट्रिय टिम)मा कसैलाई केही भएर त्यहाँ मेरो आवश्यक भए म त्यो भूमिका निभाउन तयार छु ।”