काठमाडौं । भारतीय प्रधानमन्त्री नरेन्द्र मोदीले आइतबार भारतीय जनता पार्टी (भाजपा)को चुनावी अभियान उद्घाटन गरेका छन् ।
उत्तर प्रदेशको मेरठबाट उनले सन् २०२४ को लोकसभा चुनावका लागि अभियान सुरु गरेका हुन् ।
यसअघि सन् २०१४ र २०१९ मा पनि मोदीले मेरठबाटै चुनावी अभियान सुरु गरेका थिए ।
अभियान उद्घाटन गर्दै मोदीले आगामी आम चुनाव सरकार छनोटका लागि मात्रै नभएर विकसित भारत बनाउनका लागि भएको बताएका छन् । उनले आफ्नो सरकार तेस्रो कार्यकालका लागि तयार रहेको बताए ।
“हामी आगामी पाँच वर्षको रोडम्याप तयार गर्दै छौँ । हामी हाम्रो अर्को कार्यकालको पहिलो १०० दिनमा गर्न आवश्यक पर्ने ठूला निर्णयहरूमा काम गरिरहेका छौँ । विगत १० वर्षको विकासको गति अझै द्रुत हुनेछ,” मोदीले भनेका छन् ।
उनले भारतीय कांग्रेस पार्टीले राष्ट्रविरोधी काम गरेको टिप्पणी गरे । चुनावी अभियान सुरु गर्दै मोदीले भनेका छन्, “अहिलेसम्म तपाईंहरंले विकासको ट्रेलर मात्र हेर्नुभएको छ । हामीले देशलाई अझै धेरै अगाडि लैजानुपर्छ ।”
टाइम्स अफ इन्डियाबाट ।
