काठमाडौं । इन्डियन प्रिमियर लिग (आईपीएल)कै सबैभन्दा उच्च स्कोर बनेको खेलमा सनराइजर्स हैदराबादले मुम्बई इन्डियन्सलाई ३१ रनले हराएको छ ।

बुधबार हैदराबादस्थित राजीव गान्धी अन्तर्राष्ट्रिय रंगशालामा सम्पन्न खेलमा हैदराबादले प्रस्तुत गरेको २७८ रनको कीर्तिमानी लक्ष्य पछ्याउने क्रममा मुम्बईले निर्धारित २० ओभर खेले पनि पाँच विकेट गुमाएर २४६ रनमात्र बनाउन सक्यो । 

खेलको पहिलो इनिङमा तीन ब्याटरले अर्धशतक बनाएपछि टस हारेर ब्याटिङमा आएको हैदराबादले निर्धारित २० ओभरमा तीन विकेट गुमाएर २७७ रनको कीर्तिमानी योगफल खडा गरेको थियो । आईपीएलको इतिहासमा यो अहिलेसम्मै सबैभन्दा ठूलो योगफल हो । 

हैदराबादले यसअघि सन् २०१३ को संस्करणमा रोयल च्यालेन्जर्स बेंग्लोरले बनाएको २६३ रनको कीर्तिमान तोडेको हो । उक्त संस्करणमा बेंग्लोरले पुने वारियर्सविरुद्ध निर्धारित २० ओभरमा पाँच विकेट गुमाएर २६३ रनको योगफल बनाउँदै कीर्तिमान कायम गरेको थियो ।

हैदराबादविरुद्ध मुम्बईका तिलक वर्माले ६४ रन बनाए पनि टिमको हार टार्न सकेनन् । उनले ३४ बलमा दुई चौका र ६ छक्का प्रहार गरे । टिम डेविडले ४२ रन जोड्दा इशान किशनले ३४, नमन धिरले ३० र रोहित शर्माले २६ रन बनाए । यस्तै, कप्तान हार्दिक पन्ड्याले २४ र रोमारियो सेफर्डले १५ रन थपे।

रोहित र इशानले पहिलो विकेटका लागि ३.२ ओभरमा ५६ रनको साझेदारी गर्दै मुम्बईलाई उत्कृष्ट सुरुआत दिलाएका थिए । तर, यसपछिका ब्याटरले उक्त लयलाई कायम राख्न नसक्दा मुम्बईले २४६ रनमात्र बनाउन सक्यो ।

हैदराबादका प्याट कुमिन्स र जयदेव उनादकटले समान दुई विकेट लिए । सहबाज अहमेदले एक विकेट हात पारे ।

त्यसअघि पहिले ब्याटिङमा उत्रिएको हैदराबादबाट हेनरिक क्लासेन, अभिषेक शर्मा र ट्राभिस हेडले अर्धशतक बनाएका थिए । 

क्लासेनले ३४ बलमा चार चौका र सात छक्कासहित ८० रन बनाए । हैदराबाद ११ ओभरको समाप्तिमा तीन विकेट गुमाएर १६१ रनको स्थितिमा हुँदा क्लासेनले चौथो विकेटका लागि आइदेन मार्करमसँग नौ ओभरमा ११६ रनको शतकीय साझेदारी गर्दै हैदराबादलाई कीर्तिमानी योगफलसम्म पुर्‍याएका थिए । 

क्लासेनसँगै अविजित रहेका मार्कले २८ बलमा दुई चौका र एक छक्कासहित ४२ रन बनाए । यस्तै, ओपनर ट्राभिस हेडले २४ बलमा नौ चौका र तीन छक्कासहित ६२ रन जोडे । अभिषेक शर्माले २३ बलमा तीन चौका र सात छक्कासहित ६३ रन थपे । अर्का ओपनर मयंक अग्रवाल भने ११ रनमा पभेलियन फर्किएका थिए । हैदराबादबाट ब्याटिङका निम्ति आएका पाँच ब्याटरमध्ये चार ब्याटरले कुल १८ छक्का प्रहार गरेका थिए ।

मुम्बईका हार्दिक पन्ड्या, गेरार्ड कोइट्जे र पियुश चावलाले समान एक विकेट लिए । हैदराबादविरुद्ध ६ बलर प्रयोग गरे पनि मुम्बईका कुनै पनि बलर सफल बन्न सकेनन् । चार ओभरमा ६६ रन खर्चिएका केवेना माफका मुम्बईका सबैभन्दा खर्चिलो बलर बने । 

खेलमा कुल ३८ छक्का प्रहार भएका थिए । जसमध्ये हैदराबादले १८ र मुम्बईका ब्याटरले २० छक्का प्रहार गरे ।

प्रतियोगितामा हैदराबादको यो पहिलो जितसमेत हो । जितसँगै दुई खेलबाट दुई अंक जोडेको हैदराबाद तालिकाको तेस्रो स्थानमा उक्लिएको छ । लगातार दोस्रो खेलमा हार बेहोरेको मुम्बई भने तालिकको नवौँ स्थानमा छ ।