काठमाडौं । आम आदमी पार्टी (आप)का अध्यक्षसमेत रहेका दिल्लीका मुख्यमन्त्री अरविन्द केजरीवाललाई कम्तीमा मार्च २८ सम्म हिरासतमा राखिने भएको छ । उनलाई अदालतले सात दिन हिरासतमा राखेर अनुसन्धान गर्न अनुमति दिएको हो ।
उनलाई मदिरा घोटाला प्रकरणमा बिहीबार राति पक्राउ गरिएको थियो ।
अदालतको निर्णयपछि मुख्यमन्त्री केजरीवालले सरकार सञ्चालबारे प्रतिक्रिया दिएका छन् ।
उनले आफूले जेलबाटै सरकार चलाउने बताएको भारतीय मिडिया आजतकले जनाएको छ । उनले आफूले दिल्लीको मुख्यमन्त्री पदबाट राजीनामा नदिने र जेलबाटै सरकार चलाउने बताएका हुन् ।
'आजतक'सँग कुरा गर्दै मुख्यमन्त्री केजरीवालले भनेका छन्, "म मुख्यमन्त्री पदबाट राजीनामा दिनेछैन । आवश्यक परे जेलबाटै सरकार चलाउँछु । हामीलाई थाहा छ, समस्या आउनेछ । तर, हामी काम गर्ने प्रयास गर्नेछौँ । भित्र होस् वा बाहिर सरकार त्यहीँबाट चल्छ ।"
उनले आफू नडराएको पनि बताएका छन् । उनले आफू ईडी जे चाहन्छ, त्यसका लागि तयार रहेको पनि बताएका छन् ।