काठमाडौं । हङकङको विधायिका परिषद्ले मंगलबार नयाँ राष्ट्रिय सुरक्षा कानुन सर्वसम्मतिले पारित गरेको छ ।

यो कानुनमा देशद्रोह, जासुसी, बाह्य हस्तक्षेप, राज्यको गोपनीयता र राजद्रोहबारे नयाँ नियमहरू समावेश गरिएको छ । “आजको दिन हङकङका लागि ऐतिहासिक क्षण हो,” हङकङका प्रमुख कार्यकारी जोन लीले भनेका छन् ।

नयाँ कानुनमा समाविष्ट पाँच ठूला अपराधको सजाय मार्च २३ देखि लागु हुने उनले बताए ।

यो कानुनले सरकारविरुद्धको आलोचना एवं असहमतिलाई कुल्चिन थप शक्ति प्रदान गर्ने भनिएको छ । आलोचकहरूले हङकङ चीनकै पथमा हिँडेको र चीनसँग नजिक बनेको भनेका छन् ।

बेइजिङले हङकङमा लागु गरेको राष्ट्रिय सुरक्षा कानुनको चार वर्षपछि यो नयाँ कानुन पारित भएको हो । सन् २०१९ मा हङकङमा ठूलो प्रजातन्त्र समर्थक आन्दोलन भएको थियो ।