काठमाडौं । उद्योग, वाणिज्य तथा आपूर्तिमन्त्री दामोदर भण्डारीले लगानी सम्मेलनका निम्ति सरकारले कानुनमा रहेका समस्यालाई ‘फास्ट ट्रयाक’बाट सम्बोधन गर्नुपर्ने जरुरी रहेको बताएका छन् । शनिबार काठमाडौंमा आयोजित नेपाल तयारी पोसाक उद्योग संघको २९औँ वार्षिक साधारणसभामा उनले यस्तो बताएका हुन् ।

अहिलेका कानुनमा रहेका त्रुटि, समस्यालाई चाँडोभन्दा चाँडो सम्बोधन गर्नु नै लगानी सम्मेलनका निम्ति फाइदाजनक हुने उनले उल्लेख गरे । उनले लगानीमैत्री वातावरणको पहिलो आधार विद्यमान कानुनमा सुधार र संशोधन गर्नुपर्ने रहेको बताए ।

उनले लगानीमैत्री वातावरण बनाउन सरकार तयार रहेको सुनाए । “...जबसम्म निजी क्षेत्रलाई प्रोत्साहित गर्न सकिँदैन, यो सरकार मेरो हो, यहाँ मैले मेरो लगानी ढुक्कले गर्न पाउँछु, त्यसको प्रतिफल पाइन्छ, राज्यका सहुलियतका लागि राज्य तत्पर र तयार छ, त्यो खालको अझै वातावरण बन्न नसकेको स्थिति छ,” उनले भने, “त्यो वातावरण निर्माण गर्न अहिलेको सरकार तयार छ ।”

नेपाली बजार र उद्योग क्षेत्रमा धेरै अभाव कायम रहेको मन्त्री भण्डारीको भनाइ छ । न्युज एजेन्सी नेपाल