काठमाडौं । नेदरल्यान्ड्ससँगको जितपछि नेपालका प्रतिश जिसीले आफ्नो खराब प्रदर्शनको अवस्थामा पनि प्रशिक्षक मोन्टी देसाई र टिमले विश्वास गरेको प्रतिक्रिया दिएका छन् ।

शनिबार प्रतिशले नेदरल्यान्ड्सविरुद्ध उत्कृष्ट प्रदर्शन गर्दै चार ओभरमा एक मेडनसहित तीन विकेट लिँदा १३ रन मात्र खर्चिए । उनको यो प्रदर्शन ‘म्यान अफ दी म्याच’का निम्ति योग्य बन्यो ।

खेलपछिको पत्रकार सम्मेलनमा प्रतिशले गएको बुधबार नेपाल नेदरल्यान्ड्ससँग दुई रनले पराजित हुँदाको क्षण स्मरण गरे । अन्तिम दुई बलमा तीन रन आवश्यक हुँदा प्रतिशले एक रन मात्र बनाउन सकेपछि नेपालले साँघुरो हार सामना गर्नुपरेको थियो ।

आफूमा ब्याटिङ गर्ने क्षमता हुँदा पनि असफल भएको उल्लेख गर्दै प्रतिशले त्यस्तो अवस्थामा प्रशिक्षक मोन्टीबाट साथ मिलेको बताए । खराब प्रदर्शनको अवस्थामा टिमले बेन्चमा नै सीमित गरेको भए आफ्नो मनोबल पनि खस्कँदै जाने अवस्था हुने उनको भनाइ छ ।

आज आफ्नो योजनाअनुरूप बलिङ गर्न सक्दा सफलता मिलेको प्रतिशले बताए । उनीसँगै नेपाली बलरको उत्कृष्ट प्रदर्शनमा घरेलु टोलीले नेदरल्यान्ड्समाथि ६ विकेटको जित निकाल्यो ।

• नेदरल्यान्ड्सविरुद्ध सहज जितसँगै नेपाल फाइनलनजिक 

नेपालका अलराउन्डर गुल्सन झाले खेलाडीको करियरमा कहिलेकाहीँ प्रदर्शन तलमाथि हुने उल्लेख गरे । त्यस्तो अवस्थामा आफ्ना सिनियरबाट हौसला मिल्ने गरेको उनले बताए । –न्युज एजेन्सी नेपाल