काठमाडौं । भुक्तानी प्रणाली सञ्चालक ‘फोन पे’ले नेपाल–भारत अन्तरदेशीय कारोबार गर्न सकिने सुविधा सुरु गरेको छ । बुधबारदेखि भारतीय नागरिकले नेपाल आउँदा यहाँ फोन पेको क्यूआर कोडमार्फत भुक्तानी गर्नसक्ने भएका छन् । 

फोन पेका प्रमुख कार्यकारी अधिकृत (सीईओ) दिवशकुमार सापकोटाले भने, “यसका लागि हामीले तीन वर्षदेखि काम गरिरहेका थियौँ । गत सेप्टेम्बरमा भारतमा ‘ग्लोबल फिनटेक फेस्ट २०२३’ घोषणा गरेको करिब साढे पाँच महिनामा सेवा सञ्चालन गरेका छौँ ।”

कसरी हुन्छ अन्तरदेशीय कारोबार
अन्तरदेशीय कारोबारका लागि नेपालको फोन पे र भारतको एनपीसीआई इन्टरनेसनलबीच सहकार्य भएको हो ।

नेपालमा फोन पेमा आवद्ध भएका बैंक, वित्तीय संस्था तथा भुक्तानी सेवा प्रदायक (डिजिटल वालेट) र भारतमा एनपीसीआईसँग आवद्ध भएका यस्ता संस्थाबीच अन्तरदेशीय कारोबार हुन्छ ।

अन्तरदेशीय भुक्तानीका लागि भारतको एनपीसीआईसँग यसको आफ्नै भीम एप र त्यहाँको डिजिटल वालेट फोनपे जोडिएको छ । विस्तारै गुगल पे र अन्य एप जोडिँदै जाने उनले बताए ।

नेपालमा फोन पेसँग अन्तरदेशीय भुक्तानीका लागि करिब १६ वटा संस्था आवद्ध भइसकेका छन् । फोन पेले यी बैंक तथा वित्तीय संस्था र वालेटलाई अन्तरदेशीय कारोबार सुविधा उपलब्ध गराउँछ । 

त्यसपछि बैंक तथा वित्तीय संस्था र वालेटले आवश्यकताअनुसार आफ्ना ‘मर्चेन्ट’लाई फोन पेको क्यूआरमा अन्तरदेशीय कारोबार सुविधा खुला गर्नसक्छन् । ती क्यूआर स्क्यान गरेर भारतका भीम एप वा फोनपे प्रयोगकर्ताले नेपालमा भुक्तानी गर्नसक्ने भएका हुन् ।

यो कारोबारमा शुल्क लगाउने, नलगाउने वा कति लगाउने भन्ने विषय सम्बन्धित बैंक वा वित्तीय संस्थाले नै तोक्न सक्छ ।

नेपालीले भारतमा तत्काल भुक्तानी गर्न नसक्ने
राष्ट्र बैंकको नीति–नियम बन्न बाँकी भएका कारण अहिले नेपालमा भुक्तानी लिनसक्ने सुविधा सुरु भएको फोन पेका सीईओ सापकोटाले बताए ।

“अहिले नेपालमा भुक्तानी गर्न सकिने भएको हो, भारतमा हैन । भारत गएर कति खर्च गर्न पाउने भन्ने ‘लिमिट’ राष्ट्र बैंकले तोकेपछि नेपालीले भारतमा भुक्तानी गर्न पाउने बाटो खुल्छ,” फोन पेका सीईओ सापकोटाले भने । यसका लागि फोन पेले आवश्यक कागजात राष्ट्र बैंकलाई बुझाइसकेको छ ।

भारतमा नेपाली नागरिकले कति रकम भुक्तानी गर्न पाउने भन्नेबारे भने राष्ट्र बैंकले तोक्नेछ । भारतीय नागरिकले भने नेपालमा कति भुक्तानी गर्न पाउने भन्ने सीमितता तोकिएको छैन ।