काठमाडौं । आठ महिनायता रिक्त हुँदै आएका नेपाल प्रहरीका उपरीक्षक (एसपी) पदमा बढुवा गर्ने तयारी सुरु भएको छ ।  साउनमा एसपीद्वय वामदेव गौतम र दानबहादुर मल्लले प्रहरीको ३० वर्षे सेवा अवधिका कारण अवकाश पाएपछि रिक्त हुने क्रम सुरु भएको थियो ।

हालसम्म एसपीको रिक्त दरबन्दी आठ पुगेको छ । गएको कात्तिक २४ मा गृहमन्त्रालयले पाँच एसपीलाई वरिष्ठ उपरीक्षक (एसएसपी) मा बढुवा सिफारिस गर्‍यो । बढुवा हुने एसपीहरूमा बसन्त रजौरे, रविकुमार पौडेल, नवीन राई, वीरबहादुर ओली र चन्द्रवेव राई थिए । उनीहरू बढुवा भएसँगै एसपीको रिक्त दरबन्दी सात पुग्यो ।

त्यस्तै अर्का एसपी रमेश बस्नेत गत ७ माघमा एसएसपीमा बढुवा भएसँगै एसपीको रिक्त दरबन्दी आठ पुगेको हो । प्रहरी नियमावलीअनुसार, प्रहरीमा रिक्त दरबन्दी तीन महिनाभित्र पदपूर्ति गरिसक्नुपर्ने उल्लेख छ । तर, आठ महिनापछि मात्रै बढुवाका लागि प्रहरी प्रधान कार्यालयले आन्तरिक तयारी थालेको हो ।

आठ रिक्त दरबन्दीका लागि २०६१ मा प्रहरी निरीक्षकबाट सेवा थालेका १२ डीएसपीहरू मुख्य प्रतिस्पर्धामा छन् । उनीहरू ०७२ साउन १ गते इन्सपेक्टरबाट डीएसपीमा बढुवा भएका थिए । उनीहरूसँगै डीएसपीमा बढुवा भएकाहरू हाल एसपीमा बढुवा हुँदै जिल्ला प्रहरी प्रमुख समेत बनिसकेका छन् । त्यो ब्याचका डीएसपीहरू तीन चरणमा बढुवा भएर एसपी बन्नेछन् ।

१२ डीएसपीमध्येबाट आठ जना एसपीमा बढुवा हुनेछन् भने थप चार जना छुट्ने छन् । उनीहरूले फेरि अर्को लट कुर्नुपर्नेछ ।आठ जनामध्ये हाल बढुवाको पहिलो नम्बरमा डीएसपी प्रदीपबहादुर क्षेत्री छन् । त्यसपछि क्रमशः अंगुर जीसी, ढकेन्द्र खतिवडा, यादव ढकाल, श्यामबाबु ओलिया, नारायण रञ्जितकार, निरञ्जनदत्त भट्ट छन् ।

यस्तै, राजन लिम्बू, सन्तोष तामाङ, एकनारायण कोइराला, अनन्त शर्मा र विनोद घिमिरे एसपीको मुख्य प्रतिस्पर्धी हुन् । प्रहरी प्रधान कार्यालयले १२ जनामध्येबाट नै उत्कृष्ट कार्यसम्पादन भएका ८ जना डीएसपीलाई एसपीमा बढुवा गर्ने तयारी गरेको हो ।

एसपीसम्म बढुवा गर्ने अधिकार प्रहरी महानिरीक्षकलाई हुन्छ । एसएसपीदेखि माथिल्ला तहका बढुवा गर्ने अधिकार गृह मन्त्रालयका सचिवको अध्यक्षताको बढुवा समितिलाई हुन्छ ।

किन रोकियो बढुवा ?

एसपीको बढुवा लामो समय नहुनुको प्रमुख कारण रिक्त दरबन्दी कम र अस्वाभाविक प्रतिस्पर्धा भएको प्रहरी प्रधानकार्यालयका अधिकारीहरू बताउँछन् । आठ रिक्त पदका लागि मुख्य प्रतिस्पर्धामा रहेका १२ जना शक्तिकेन्द्रका नजिका डीएसपी भएका कारण बढुवा प्रक्रिया नै रोकिएको हो ।

त्यसबाहेक प्रहरी प्रधान कार्यायका अनुसार, ०७२ साउन भन्दापछि डीएसपीमा बढुवा भएका केही डीएसपीहरूले समेत बढुवाका लागि शक्ति केन्द्रमार्फत् दवाब श्रृजना गरेपछि बढुवा प्रक्रिया लथालिङ्ग भएको हो ।

प्रहरी प्रवक्ता डीआईजी भीमप्रसाद ढकाल भने नियमित प्रक्रियाअनुसार बढुवा हुने बताउँछन् ।