काठमाडौं । बलात्कार मुद्दामा दोषी ठहर भएका क्रिकेटर सन्दीप लामिछानेले जिल्ला अदालत काठमाडौंको फैसलाविरुद्ध उच्च अदालत पाटनमा पुनरावेदन गरेका छन् । जिल्ला अदालतको फैसला बदरको मागसहित बिहीबार कानुन व्यवसायीसहित आफैँ उच्च अदालत पुगेका हुन् । 

सन्दीपका वकिल सरोजकृष्ण घिमिरेका अनुसार उच्च अदालतमा पुनरावेदनको प्रक्रिया अन्तिम चरणमा पुगेको छ । क्रिकेटर लामिछानेलाई काठमाडौं जिल्ला अदालतले आठ वर्ष कैद र तीन लाख जरिबानाको फैसला गरेको थियो । 

थप दुई लाख पीडित गौशाला २६ (छ) लाई क्षतिपूर्ति दिनुपर्ने फैसलामा उल्लेख छ । नाबालिग भन्दै मुद्दा परेकोमा अदालतले जन्मदर्ताको कागजातअनुसार गौशला २६ (छ) बालिग भएको ठहर गरेको थियो । तर, आर्थिक अवस्थाको नाजायज फाइदा सन्दीपले उठाएको काठमाडौं जिल्ला अदालतको ठहर छ । 

अदालतमा करणी नै नभएको दाबीसहित प्रतिवाद गरेका सन्दीपले गौशाला २६(छ) बालिग रहेको दाबीसहित नक्कली र सक्कली प्रमाण पेस गरेका थिए । नागरिकता, जन्मदर्ताको कागज र सर्टिफिकेटबाट नाबालिग देखिएकी गौशाला २६ (छ)का विषयमा अदालतबाट पटक–पटक जन्मदर्ताको कागज झिकाउने आदेश भएको थियो । 

उनकी आमाको समेत उमेर एकीन गर्ने आदेशपछि अन्तिम पटक झिकाएको जन्मदर्ता कागजका आधारमा अदालतले गौशाला २६ (छ) लाई बालिग ठहर गरेको हो । त्यसकै आधारमा करणी ठहर भएपछि सन्दीप फैसला बदरको मागसहित उच्च अदालत गएका हुन् ।