काठमाडौं । सूर्य नेपाल गल्फ टूर २०२३–२४ अन्तर्गतको चौथो प्रतियोगिता, सूर्य नेपाल वेस्टर्न ओपनको पहिलो दिन भुवन नगरकोटीले एक स्ट्रोकको अग्रता बनाएका छन् । 

बुधबार पोखरास्थित पार–६९ को हिमालयन गल्फ क्लबमा पूर्वनम्बर एक प्रो भुवन ३–अन्डर ६६ को स्कोरमा शीर्ष स्थानमा रहेका हुन् । एमेच्योर खेलाडी सद्भाव आचार्य २–अन्डर ६७ मा खेल सकाउँदै दोश्रो स्थानमा रहे । रवि खड्का र निरज तामाङले इभन–पार ६९ को स्कोरमा तश्रो स्थान बाँडे । 

१–ओभर ७० सहित धनबहादुर थापा पाँचौँ स्थानमा रहँदा दीपक आचार्य र टंकबहादुर कार्की २–ओभर ७१ सहित संयुक्तरूपमा छैटौँ स्थानमा रहे । बलभद्र राई, भुवनकुमार रोक्का, दीपक मगर, दिनेश प्रजापति तथा एमेच्योर सुन्दर राई ३–ओभर ७२ को स्कोरमा संयुक्तरूपमा आठौँ स्थानमा रहेका छन् । 

लिडर भुवनले दोश्रो होलमा बर्डी प्रहार गर्दै फ्रन्ट नाइनमा १–अन्डर ३३ मा पुरा गरे । यसपछि तीन बर्डी खेलेका उनले एक बोगी खेप्दा ब्याक नाइन २–अन्डर ३५ मा सकाए । भुवनले ११औँ, १५औँ र १८औँ होलमा एक–एक सट बचाउँदा १२औँ होलमा बोगीको सामना गरे । 

सूर्य नेपाल गल्फ टूर २०२३–२४ अन्तर्गत सिजनको पहिलो प्रतियोगिता, सूर्य नेपाल सेन्ट्रल ओपनको उपाधि विजेता सद्भावले फ्रन्ट नाइन १–अन्डर ३३ र ब्याक नाइन १–अन्डर ३४ मा सकाए । उनले तेश्रो होलमा बर्डी प्रहार गर्दै फ्रन्ट नाइन बोगीरहित खेले । यसपछि १२औँ होलमा बोगी खेपेका सद्भावले १३औँ र १५औँ होलमा बर्डी प्रहार गरे । 

पूर्वनम्बर एक प्रो रविले फ्रन्ट नाइन इभन–पार ३४ मा सकाए र ब्याक नाइनमा इभन–पार ३५ खेले । चौथो र आठौँ होलमा बर्डी प्रहार गरेका रविले छैटौँ होलमा डबल बोगी खेपे । यसपछि १०औँ होलमा बर्डी प्रहार गरे भने रविले १८औँ होलमा एक सट खेर फाले ।

निरजले फ्रन्ट नाइनमा बोगीरहित १–अन्डर ३३ खेल्दा ब्याक नाइनमा १–ओभर ३६ खेले । उनले तेश्रो होलमा बर्डी प्रहार गरे । यसपछि निरजले १३औँ र १५औँ होलमा बोगी खेपे भने १४औँ होलमा एक सट जोगाए ।