काठमाडौं । साफ महिला च्याम्पियनसिप–२०२४ को पहिलो खेलमा भारतसँग पराजित भएपछि पाकिस्तानी टिमका मुख्य प्रशिक्षक अदिल रिज्की रेफ्रीको निर्णयप्रति असन्तुष्ट बनेका छन् । खेलपछि पत्रकारसँगको कुराकानीमा रिज्कीले रेफ्रीबाट भएका केही खराब निर्णयले पाकिस्तानी टिमलाई समस्यामा पारेको बताए ।

बिहीबार त्रिपुरेश्वरस्थित दशरथ रंगशालामा भएको खेलमा प्रतियोगिताकै सबैभन्दा सफल टिम भारतले पाकिस्तानविरुद्ध ५–२ को जित निकालेको थियो ।

“आज रेफ्री ठूलो समस्याको रूपमा रहे । त्यहाँ केही खराब निर्णय भए । जसले पक्कै पनि हाम्रो टिमलाई समस्यामा पार्‍यो । रेफ्री एसेसर भारतकै थिए,” रिज्कीले भने, “तर पनि जितको श्रेय भारतलाई जान्छ । उनीहरूले राम्रो फुटबल खेले ।”

जितसहित प्रतियोगिताको सुरुआत गरेको भारत समूह ‘ए’ को शीर्ष स्थानमा उक्लिएको छ । यस समूहमा भारत र पाकिस्तानसँगै साविक विजेता बंगलादेश छन् । यस्तै, समूह ‘बी’मा साविक उपविजेता नेपालसँगै माल्दिभ्स, श्रीलंका र भुटान छन् ।