काठमाडौं । सिन्धुलीमा स्वास्थ्य चौकी निर्माणका लागि जापान सरकारले सहयोग गर्ने भएको छ ।

नेपालका लागि जापानका राजदूत किकुता युताका र सहकारी नेपाल सिन्धुलीकी अध्यक्ष सिरमला तामाङले यसका लागि सम्झौता पत्रमा हस्ताक्षर गरेका छन् ।

काठमाडौंस्थित जापानी राजदूतावासमा बुधबार सम्झौतामा हस्ताक्षर भएको दूतावासले जनाएको छ । 

सम्झौता अनुसार जापानले ग्रासरुट्स ह्युमन सेक्युरिटी प्रोजेक्ट्स (जीजीपी) अन्तर्गतबाट करिब ९७ लाख नेपाली रुपैयाँ (७३ हजार ७४७ अमेरिकी डलर) अनुदान उपलब्ध गराउने भएको हो ।

यो रकमले सिन्धुलीको गोलन्जोर गाउँपालिका वडा नम्बर १ स्थित स्वास्थ्य चौकीको पुनर्निर्माण गरिनेछ ।

करिब ४० वर्षअघि निर्माण भएको पुनर्निर्माणको व्यवस्थापन गोलन्जोर गाउँपालिका र सहकारी नेपाल, सिन्धुलीले गर्ने जापानी दूतावासले जनाएको छ ।

तल्लो तहका समुदायको सामाजिक एवं आर्थिक विकासमा सहायता गर्न स्थापित जीजीपी अन्तर्गत सन् १९९१ यता नेपालमा दुई सयभन्दा बढी परियोजनाहरू सम्पन्न भएको दूतावासले बताएको छ ।