विराटनगर । उच्च अदालतको आदेशपछि मोरङ जिल्ला खेलकुद विकास समितिका अध्यक्ष इन्द्रकुमार योन्जन तामाङ पुनः पदमा फर्किएका छन् । उच्च अदालत विराटनगरको आदेशपछि तामाङले मंगलबार पुनः समितिको अध्यक्षको जिम्मेवारी सम्हालेका छन् । 

तामाङ २०८० चैत २३ गते चारवर्षे कार्यकालका लागि अध्यक्षमा नियुक्त भएका थिए । तर, २०८१ भदौ ६ गते प्रदेश खेलकुद विकास बोर्ड, कोसीका सदस्य–सचिव पर्शुराम बस्नेत (कृष्ण)ले उनलाई पदमुक्त गरेका थिए । बस्नेतले आफ्ना निकट राजनीतिक कार्यकर्तालाई नियुक्त गर्न तामाङलाई हटाएको आरोप लागेको थियो । 

तामाङलाई हटाइएपछि २०८१ माघ १७ गते सामाजिक विकासमन्त्री तथा बोर्ड अध्यक्ष पाँचकर्ण राईको अध्यक्षतामा बसेको बैठकले सुरज श्रेष्ठलाई नयाँ अध्यक्ष नियुक्त गरेको थियो । श्रेष्ठ नेकपा एमाले मोरङका जिल्ला सदस्य तथा बस्नेतका नजिकका व्यक्तिका रूपमा चिनिन्छन् ।

पदच्युत भएपछि तामाङले उच्च अदालत विराटनगरमा पुनर्बहालीको माग गर्दै रिट दायर गरेका थिए । उक्त रिटमाथि सुनुवाइ गर्दै न्यायाधीशद्वय राजेन्द्र अधिकारी र केशवप्रसाद बास्तोलाको संयुक्त इजलासले तामाङको पक्षमा आदेश जारी गर्दै पूर्वस्थितिमा पुनः बहाली गर्न निर्देशन दिएको थियो ।

अदालतको आदेशअनुसार तामाङले मंगलबार अध्यक्षको कार्यभार पुनः सम्हाले । कार्यभार ग्रहणपछि उनले आफूलाई राजनीतिक पूर्वाग्रहका आधारमा हटाइएको टिप्पणी गर्दै भने, “अदालतको आदेशले न्यायको जित र कानुनी शासनको प्रमाण दिएको छ । लोकतान्त्रिक व्यवस्थामा न्यायालयप्रतिको जनविश्वास अझ बलियो भएको छ ।”

उनले अब मोरङ जिल्लाको खेलकुद गतिविधिलाई पुनः सक्रिय बनाउने अठोट गर्दै भने, “सबै खेल संघ र खेलाडीहरूसँग सहकार्य गर्दै निष्पक्ष र पारदर्शी ढंगले नेतृत्व गर्नेछु । राजनीतिक हस्तक्षेपबिना समितिको काम अगाडि बढाउने मेरो प्रतिबद्धता छ ।”

यसअघि तामाङले सदस्य–सचिव बस्नेत र बोर्डविरुद्ध अदालतमा अपहेलना मुद्दा पनि दायर गरेका थिए, तर सो मुद्दा अदालतले खारेज गरेको थियो ।