काठमाडौं । विशेष अदालतले घुस प्रकरणमा घुस माग्ने, घुस बुझ्ने र घुस दिने तीनै पक्षलाई दोषी ठहर गरेको छ । विशेष अदालतका न्यायाधीशहरू टेकनारायण कुँवर, रामहादुर थापा र रितेन्द्र थापाको इजलासले शुक्रबार तीनै जनालाई सजाय हुने फैसला गरेको हो ।

अदालतले जग्गा रजिस्ट्रेसनका लागि घुस मागेको अभियोगमा बाराको कलैयास्थित भूमि सुधार तथा मालपोत कार्यालयका खरिदार रामविश्वास साहलाई दोषी ठहर गरेको छ । उनले मागेको घुस रकम बुझ्ने गौरी शंकर साह र घुस दिने नविन अख्तर मियाँ धोवीलाई पनि कैद तथा जरिवानाको फैसला भएको हो ।

अख्तियार दुरुपयोग अनुसन्धान आयोगले गत जेठ २ गते मुद्दा दायर गर्दा घुस माग्ने खरिदार साह र घुस रकम बुझ्ने गौरी शंकरलाई मात्र विपक्षी बनाएको थियो । मुद्दामा अख्तियारले घुस दिने धोबीलाई सरकारी साक्षी बनाएको थियो । तर, धोबीले विशेष अदालतमा घुस लेनदेन भएको विषयमा प्रतिकूल बयान दिएपछि अख्तियारले गएको भदौ २ गते उनविरुद्ध पनि मुद्दा दायर गरेको थियो ।

तीनैजनाको फैसला हुँदा घुस माग्ने साहलाई एक महिना कैदसहित १५ हजार जरिवाना, घुसबापतको पैसा बुझ्ने गौरी शंकरलाई मतियार ठहर गरी १५ दिन कैदसहित सात हजार ५०० रुपैयाँ जरिवाना र बयान फेरेका धोबीलाई मुख्य अभियुक्तसरह एक महिना कैदसहित १५ हजार जरिवानाको फैसला भएको हो ।