काठमाडौं । नेपाल र थाइल्यान्डबीच बुधबार आठवटा विभिन्न सम्झौता र समझदारीपत्रमा हस्ताक्षर तथा आदानप्रदान भएको छ । बैंककमा प्रधानमन्त्री केपी शर्मा ओली र थाइल्यान्डका प्रधानमन्त्री पे थोङ् थान् शिनावात्राबीच दुईपक्षीय भेटवार्तापछि ती सम्झौता र समझदारीपत्रमा हस्ताक्षर भएको हो ।

हस्ताक्षर भएका आठ सम्झौता र समझदारीपत्रमध्ये दुईवटा सरकारी निकायबीच र ६ वटा निजी क्षेत्रबीच भएको थियो । सरकारी निकायबीच भएका दुईवटा सम्झौतामा नेपालको तर्फबाट परराष्ट्रमन्त्री आरजु राणा देउवाले ती समझदारीपत्रमा हस्ताक्षर गरेकी थिइन् ।

यसैगरी, थाइल्यान्डका तर्फबाट संस्कृतिसम्बन्धी समझदारीपत्रमा संस्कृतिमन्त्री सुदावान वाङसुफाकिजकोसोल र पर्यटन सहयोगसम्बन्धी सम्झौतापत्रमा पर्यटन तथा खेलकुदमन्त्री सोरावाङ तिनथोङले हस्ताक्षर गरेका थिए ।

नेपाल उद्योग वाणिज्य महासंघ र थाइल्यान्डको व्यापार बोर्डबीच पनि सम्झौता भएको छ । महासंघ र थाइल्यान्डको थाई चेम्बर अफ कमर्स एन्ड बोर्ड अफ ट्रेडबीच आपसी सहकार्य तथा व्यापार व्यवसाय अभिवृद्धिका विषयमा समझदारी भएको हो ।

दुवै देशका प्रधानमन्त्रीको उपस्थितिमा आज बैंककमा भएको समझदारीपत्रमा नेपाल उद्योग वाणिज्य महासंघका अध्यक्ष चन्द्रप्रसाद ढकाल र थाई चेम्बर अफ कमर्स एन्ड बोर्ड अफ ट्रेडका अध्यक्ष सानन अङगुबोल्कुलले हस्ताक्षर गरेका थिए ।

यस समझदारीले नेपाल र थाइल्यान्डबीच व्यापारिक सम्बन्धलाई सुदृढ गर्ने, आर्थिक सहकार्यलाई प्रवर्धन गर्ने तथा व्यापार र लगानी विस्तारका लागि संरचित रूपरेखा तयार गर्ने लक्ष्य राखेको छ ।

साथै, दुई देशबीचको व्यापारिक सहकार्यलाई थप मजबुत बनाउने र आर्थिक सहकार्यलाई विस्तार गर्न महत्त्वपूर्ण योगदान गर्ने विश्वास गरिएको छ ।

त्यस्तै, नेपाल उद्योग परिसंई र थाई उद्योग महासंघ, नेपाल चेम्बर अफ कमर्स र थाइल्यान्डको पर्यटन परिषद्‌बीच पनि सम्झोतापत्रमा हस्ताक्षर भएको छ । काठमाडौं विश्वविद्यालय र सियाम विश्वविद्यालयबीच पनि सम्झौतापत्रमा हस्ताक्षर भएको छ ।