काठमाडौं । मेडिकल राहत सामग्रीसहित नेपाली सेनाको २२ सदस्यीय एक टोली म्यानमार प्रस्थान गरेको छ । म्यानमारमा हालै गएको विनाशकारी भूकम्पका कारण भएको व्यापक धनजनको क्षतिपछि नेपाल सरकारको निर्णयबमोजिम मेडिकल राहतसहित नेपाली सेनाको टोली बुधबार त्यसतर्फ प्रस्थान गरेको हो ।

प्रमुख सेनानी रामचन्द्र श्रेष्ठको नेतृत्वमा १२ जना चिकित्सकीय टिम, चारजना बन्दोबस्ती सहायता टिम र ६ जना 'क्रू मेम्बर'सहित कुल २२ सदस्यीय टोली नेपाली सेनाको सीएन–२३५ सीएएसए विमानद्वारा म्यानमारतर्फ प्रस्थान गरेको हो ।

“विभिन्न प्रकृतिका आवश्यक औषधि एवं उपकरणसहित उक्त टोलीमा सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरू संलग्न रहेका छन्,” नेपाली सेनाले बुधबार जारी गरेको विज्ञप्तिमा उल्लेख छ ।

उक्त टोलीले करिब एक साता म्यानमार भूकम्पमा परी घाइते भएकाहरूको स्वास्थ्य उपचारमा खटिई सेवा प्रदान गर्ने सेनाले जनाएको छ ।

गत शुक्रबार थाइल्यान्डमा ७.७ म्याग्निच्यूडको भूकम्प गएको थियो । भूकम्पले संरचनाहरू भत्किँदा मृत्यु हुनेको संख्या दुईहजार ७०० नाघेको छ । उद्धार कार्य जारी रहेकाले मृतकको संख्या अझ बढ्ने जनाइएको छ ।