काठमाडौं । केप भर्डलाई पेनाल्टी सुटआउटमा २–१ ले हराउँदै दक्षिण अफ्रिका अफ्रिका कप अफ नेसन्सको सेमिफाइनलमा प्रवेश गरेको ।

शनिबार राति भएको पेनाल्टीमा दक्षिण अफ्रिकाका तेबोहो मोकोएना र मोथोबी एम्वालाले गोल गरे । दक्षिण अफ्रिकाबाट प्रहारका लागि आएका बाँकी दुई खेलाडीले भने गोल गर्न सकेनन् ।

केप भर्डबाट पेनाल्टीका लागि आएका पाँच खेलाडीमध्ये ब्रयन सिल्भाले मात्र गोल गरे ।

त्यसअघि खेलको निर्धारित र अतिरिक्त समयमा केप भर्ड र दक्षिण अफ्रिकाले गोलरहित बराबरी खेलेका थिए ।

जितसँगै सेमिफाइनल प्रवेश गरेको दक्षिण अफ्रिकाले अब फाइनल प्रवेशका लागि नाइजेरियासँग खेल्नेछ । यी दुईबीचको खेल फेब्रुअरी ७ मा हुनेछ ।

शनिबार नै भएको अर्को खेलमा मालीविरुद्ध २–१ को पुनरागमन जित निकाल्दै घरेलु टिम आइभेरी कोस्टले पनि सेमिफाइनलमा स्थान बनाएको छ ।

आइभेरी कोस्टको स्टाड बाउकेमा भएको खेलमा घरेलु टिमले निर्धारित समयको अन्तिम मिनेटसम्म १–० ले पछि परेको अवस्था उल्ट्याउँदै जित निकालेको हो । 

७१औँ मिनेटमा नेने डोर्गेलेसले गोल गर्दै मालीलाई अग्रतामा राखेका थिए । तर, ९०औँ मिनेटमा सिमोन एन्डिग्राले गोल गरेपछि आइभेरी कोस्ट खेलमा फर्किएको थियो ।

यस्तै, अतिरिक्त समयको इन्जुरी टाइममा आउमार डिएकिटेले निर्णायक गोल गरेपछि आइभेरी कोस्ट सनसनीपूर्ण जित निकाल्दै सेमिफाइनलमा प्रवेश गरेको हो ।

त्यसअघि खेलको ४३औँ मिनेटमा ओडिलोन कोसोउनोउ र अन्तिम समयमा गोलपछि ओउमार डिएकिटेले रातो कार्डको दर्शन गर्दा आइभेरी कोस्ट नौ खेलाडीमा समेटिएको थियो । यस्तै, इन्जुरी समयमै हमारी ट्रोरेले रातो कार्ड पाउँदा माली पनि १० खेलाडीमा समेटिएको थियो ।

आइभेरी कोस्टले अब फाइनल प्रवेशका लागि डीआर कंगोसँग खेल्नेछ । यी दुईबीचको खेल फेब्रुअरी ८ मा हुनेछ ।