काठमाडौं । चलचित्र ‘ऐश्वर्य’बाट खलनायकको रूपमा नेपाली सिनेमा उद्योगमा प्रवेश गरेका कलाकार प्रशान्त ताम्राकार आफैँ निर्माणमा होमिने भएका छन् । उनी स्वयंले चलचित्र निर्माण गर्न लागेका हुन् ।
 
सिनेमा निर्माणका लागि स्क्रिप्टको काम सकिसकेको उनले जानकारी दिए । उनीसहितको टिम मिलेर संयुक्त रूपमा सिनेमा बनाउन लागेको हो । “हाम्रो आफ्नै टिम छ । टिमले मिलेर सिनेमा बनाउन लागेको हो,” प्रशान्त बाह्रखरीसँग भन्छन् । उनका अनुसार रोनी मानन्धरले सिनेमा निर्देशन गर्नेछन् । 

क्राइम थ्रिलर जानरामा निर्माण हुने सिनेमा केही महिनापछि फ्लोरमा जाने उनको भनाइ छ । बक्सअफिस कलेक्सन राम्रो भयो भने आफूसहितको समूहले चलचित्र निर्माणलाई निरन्तरता दिने उनले बताए । 

एक्सनप्रधान सिनेमा लामो समयदेखि नबन्दा एक्सनको विधामा काम गर्ने धेरै कलाकार तथा फाइटर बेरोजगार र पलायन समेत भएको भन्दै यसलाई कम गर्न आवश्यक रहेको उनको भनाइ छ । “एक्सन सिनेमा नबन्दा धेरै कलाकार पलायन हुनुभयो । कति ट्यालेन्ट आउन चाहेर पनि आउन सकेका छैनन्,” उनी भन्छन्, “यो विधामा काम गर्न सकिने धेरै विषय छन् । बजार छ । तर काम नभएपछि हामी आफैँ मिलेर सिनेमा बनाउन लागेका हौँ ।” 

क्राइम थिलर, एक्सन, युथ क्राइम, क्राइमसँग जोडिएर आउने रियल स्टोरीहरूमा आफूहरूले तयारी गरिरहेको उनले जानकारी दिए । नयाँ पुस्ताले पनि काम पाउनु पर्छ र यो विधा पनि रहिरहनु पर्छ भन्ने आफ्नो मान्यता रहेको प्रशान्त बताउँछन् । आफ्नो कम्पनीले बनाउने सिनेमा हार्डकोर एक्सन मात्रै भने नहुने स्पष्ट पार्छन् ।