काठमाडौं । इरानले इजरायलमा प्रहार गरेको पछिल्लो हमलामा नयाँ म्यानुभरेबल ब्यालिस्टिक मिसाइल प्रयोग गरेको बताएको छ ।

इरानको राज्य नियन्त्रित समाचार एजेन्सी फार्सका अनुसार, इजरायलमा आइतबार राति गरिएको हमलामा हाज कासेम गाइडेड ब्यालिस्टिक मिसाइलले प्रहार गरेको सीएनएनले जनाएको हो ।

इरानी रक्षामन्त्री जनरल अजिज नासिरजादेले यो नयाँ मिसाइल अमेरिकी सेनाको टर्मिनल हाई एल्टिच्युड डिफेन्स, प्याट्रियट मिसाइल डिफेन्स र इजरायलले प्रयोग गरेका अन्य रक्षा प्रणालीहरूलाई छल्न सक्षम रहेको मे ४ मा इरानी टीभीलाई बताएका थिए ।

इरानको तस्निम समाचार एजेन्सी अनुसार, इरानले यो मिसाइललाई मे महिनाको सुरुमा सार्वजनिक गरेको थियो। यो सोलिड–फ्युवल मिसाइल हो जसको दायरा १,२०० किलोमिटर सम्म छ र यसमा मिसाइल डिफेन्स प्रणाली छल्न सक्ने म्यानुभरेबल वारहेड लगाइएको छ ।

तस्निमले मे महिनाको सुरुमा प्रकाशित गरेको समाचार रिपोर्टमा यो नयाँ ब्यालिस्टिक मिसाइलमा एड्भान्स्ड नेभिगेशन प्रणाली पनि रहेको र जसले लक्ष्यमा सटीक प्रहार गर्न र इलेक्ट्रोनिक युद्धलाई प्रतिरोध गर्न सक्षम बनाउने बताएको थियो ।

यो मिसाइल कासेम सुलेमानीको नाममा राखिएको हो । उनी इरानी इस्लामिक रिभोल्युशनरी गाड्र्स कप्र्सको विशेष सैन्य इकाई कुद्स फोर्सका पूर्व कमाण्डर थिए । उनी अमेरिकी राष्ट्रपति डोनाल्ड ट्रम्पको पहिलो कार्यकालमा इराकमा अमेरिकी हमलामा मारिएको थियो ।

गएराति इजरायलको मध्य क्षेत्र बात याम सहरमा इरानी इरानले म्यानुभरेबल ब्यालिस्टिक मिसाइल प्रहारका कारण चार जनाको मृत्यु भएकोमा जसमा १० वर्षीय एक बालक पनि परेको इजरायलको आपतकालीन् सेवाहरूले जनाएको छ । 

एउटा भवनलाई निशाना बनाएर आक्रमण गरिएपछि अहिले इजरायलको ब्रुकलिन पार्क शहरमा ठूलो आपतकालीन् प्रतिकार्य अभियान चलिरहेको बताइएको छ ।

इजरायलको राष्ट्रिय आपतकालीन सेवा मागेन डेभिड एडमका अनुसार, ६० वर्षीया एक महिला, ८० वर्षीया अर्की महिला र उमेर नखुलेकि एक बालिका पनि यो आक्रमणमा मारिएका छन् ।