पोखरा । टाइगर कप भलिबल प्रतियोगितामा विदेशी खेलाडीको पनि सहभागिता रहने भएको छ । आइतबार आयोजित पत्रकार सम्मेलनमा गण्डकी प्रदेशका महिला र पुरुष दुवै टिममा तीन/तीन भारतीय खेलाडीले सहभागिता जनाउने जानकारी गराइयो ।

प्रतियोगिता सोमबार (भोलि)देखि पोखरामा सुरु हुँदै छ । भारतीय राष्ट्रिय भलिबल टिमका कप्तान विनीतकुमार चौधरीसहितका तीनजना समेत प्रतियोगितामा सहभागी हुनेछन् ।

टाइगर ग्रुप अफ पोखराका अध्यक्ष नारायण शर्माले अरू टिममा पनि विदेशी खेलाडीको सहभागिता रहने जानकारी दिए ।

प्रतियोगितामा महिलातर्फ भारतको हरियाणा क्लबसहित चन्द्रागिरि नगरपालिका, न्यु डायमन्ड स्पोर्ट्स क्लब, आयोजक गण्डकी प्रदेश र तीन विभागीय टिम नेपाल पुलिस, त्रिभुवन आर्मी र सशस्त्र प्रहरीको एपीएफ क्लबले सहभागिता जनाउने अध्यक्ष शर्माले बताए ।

पुरुषतर्फ श्रीलंकन टिमसहित तीन विभागीय त्रिभुवन आर्मी, नेपाल पुलिस र एपीएफ क्लब, हेल्प नेपाल स्पोर्ट्स क्लब र आयोजक टिम प्रतिस्पर्धामा उत्रँदै छन् ।

महिला र पुरुष दुवैतर्फका विजेताले पाँच लाख ५५ हजार ५५५, उपविजेताले दुई लाख ५५ हजार ५५५ र तेस्रो हुने टिमले एक लाख २५ हजार ५५५ रुपैयाँ नगद पुरस्कार प्राप्त गर्नेछन् ।

यस्तै, प्रतियोगितामा दुवैतर्फका सर्वोत्कृष्ट खेलाडीले २५ हजार र विद्यागततर्फ उत्कृष्टले १५ हजार रुपैयाँबराबरको गिफ्ट ह्याम्पर प्राप्त गर्नेछन् ।

प्रतियोगिता ‘लिग कम नकआउट’का आधारमा सञ्चालन गरिनेछ ।