![दोस्रो क्वालिफायरमा पोखरालाई ललितपुरको चुनौती](https://12khari.top/uploads/posts/RANGASALA-1701652523.jpg)
काठमाडौं । नेपाल सुपर लिग (एनएसएल)को दोस्रो क्वालिफायरमा आज पोखरा थन्डर्ससामू ललितपुर सिटी एफसीले चुनौती प्रस्तुत गर्दै छ ।
यसअघि पहिलो क्वालिफायरमा धनगढी एफसीसँग पराजित भएपछि पोखराले दोस्रो क्वालिफायर खेल्ने मौका पाएको हो ।
यता, ललितपुरले भने इलिमिनेटरमा साविक विजेता काठमाडौं रेजर्सविरुद्ध ३–० को जित निकाल्दै दोस्रो क्वालिफायरमा स्थान बनाएको हो । आजको खेलमा जित निकाल्ने टिमले उपाधिका लागि साविक उपविजेतासमेत रहेको धनगढीसँग खेल्नेछ । धनगढीले पहिलो क्वालिफायरमा पोखरालाई ४–३ ले हराउँदै फाइनलमा स्थान पक्का गरेको हो ।
त्रिपुरेश्वरस्थित दशरथ रंगशालामा हुने यो खेल अपराह्न ५ः३० बजेदेखि सुरु हुनेछ । मंसिर ८ गतेदेखि सुरु भएको प्रतियोगितामा कुल नौ टिमको सहभागिता थियो । जसमध्ये पोखरा थन्डर्स, धनगढी एफसी, काठमाडौं रेजर्स र ललितपुर सिटी एफसी शीर्ष चारमा रहँदै प्लेअफमा आइपुगेको थिए ।
प्रतियोगिताको फाइनल खेल शनिबार दशरथ रंगशालामा नै हुनेछ ।