काठमाडौं । इजिप्टको एक फुटबल खेलको नतिजाका लागि ३४ पेनाल्टी प्रहार भएका छन् । सोमबार इजिप्सियन सुपर कपको रोमाञ्चक सेमिफाइनलमा मोर्डन फ्युचरले पिरामिड्सलाई पेनाल्टी सुटआउटमा १४–१३ ले पराजित गर्दै फाइनलमा स्थान बनाएको छ ।

खेलको निर्धारित समय गोलरहीत बराबरीमा समाप्त भएपछि नतिजाको निर्णय पेनाल्टी सुटआउटबाट भएको हो । जसमा दुवै टिमले कुल ३४ पटक प्रहार गरेका हुन् । पेनाल्टीमा मोर्डन फ्युचरका तीन र पिरामिड्सका प्रहार गोलमा परिणत हुन सकेन । यो खेल युनाइटेड अरब इमिरेट्स (यूएई) स्थित मोहम्मद बिन जयेद रंगशालामा भएको थियो ।

मोर्डन फ्युचरले अब उपाधिका लागि अल अह्ली वा सेरामिका क्लेओपाट्रासँग खेल्नेछ । 

हालसम्म विश्व फुटबलमा सबैभन्दा धेरै पेनाल्टी गत वर्ष इंग्ल्यान्डको एक स्थानीय खेलमा भएको थियो । वासिङ्टन एफसी र बेड्लिङटोन टेरियर्सबीच भएको उक्त खेलमा कुल ५४ पेनाल्टी प्रहार भएका थिए । जसमा वासिङ्टन एफसीले बेड्लिङटोन टेरियर्सलाई २५–२४ ले पराजित गरेको थियो । 

यस्तै, सन् २००५ मा भएको नामिबियन कपअन्तर्गत केके प्यालेस र सिभिक्सबीचको खेलमा पनि कुल ४८ पेनाल्टी प्रहार भएका थिए ।