काठमाडौं । नेपाल सुपर लिग (एनएसएल) को पहिलो क्वालिफायरमा पोखरा थन्डर्सले साविक उपविजेता धनगढी एफसीविरुद्ध पहिलो हाफमा १–० को अग्रता बनाएको छ । 

त्रिपुरेश्वरस्थित दशरथ रंगशालामा जारी खेलको पाँच मिनेटमा नै पोखराले अग्रता बनाएको हो । पाँचौँ मिनेटमा आयुश घलानले गोल गर्दै पोखरलाई अग्रतामा राखेका हुन् । मोसेस त्वमले लेफ्ट साइडबाट गरेको क्रसलाई धनगढीको रक्षकले क्लियर गर्न नसक्दा अनमार्क रहेका आयुशले ६ यार्ड बक्सबाट बललाई सहजै पोस्टको दिशा दिए ।

आठौँ मिनेटमा पोखराको अग्रता दोब्बर बनाउने सुनौलो अवसर धनगढीका गोलकिपर मोहम्मद ताहा बाधक बने । आयुश घलानले पेनाल्टी बक्सभित्रबाट तीन रक्षकलाई चकित पार्दै निकालेको ‘ब्याक पास’ मा दीपेश आले मगरको प्रहारलाई ताहाले उत्कृष्ट बचाउ गरे ।

१९औँ मिनेटमा पोखराका मोसेस त्वमको प्रहार पोस्ट नजिकबाट बाहिरियो । स्टेफन पापा एनोरले लेफ्ट साइडबाट गरेको क्रसमा त्वमको ‘भली’ सेकेन्ड बार नजिकबाट बाहिरिएपछि धनगढीको खतरा टरेको थियो ।

२४औँ मिनेटमा अहमद हिजाजीको हेडरमा पोखराका नरेन्द्र चौधरी बाधक बन्दा धनगढी बराबरीमा फर्किन सकेन । अभिषेक गुरुङको राइट साइडबाट गरेको क्रसमा पेनाल्टी बक्सभित्र अनमार्क रहेका अहमद हिजाजीको हेडरलाई गोललाइनबाट नरेन्द्रले छातीले रोक्दै धनगढीको खेलमा फर्किने प्रयासलाई सफल बन्न दिएनन् ।

३१औँ मिनेटमा जोए आइडुको फ्रिकिकमा पुनः धनगढीका गोलकिपरले उत्कृष्ट बचाउ गरे । धनगढीका कप्तान देवेन्द्र तामाङको ह्यान्ड भएपछि पेनाल्टी बक्स बाहिरबाट फ्रिकिक पाएको थियो । जसमा आइडुको लोअर प्रहार राइट साइडमा ताहाले डाइभ हान्दै बललाई जोगाएका थिए । सोही बल पोस्टमा ठोक्किएर रिबाउन्ड आउँदा पोखराका मोसेस त्वम प्रहारका लागि पुगे पनि पुनः ताहाले बललाई नियन्त्रणमा राख्दै खतरा टारे ।

लिग चरणबाट नवीन न्यौपानेको टोली पोखरा शीर्ष स्थानमा रहँदै अन्तिम चारमा आइपुगेको हो । पोखराले आठ खेलमध्ये चारमा जित निकाल्दा तीनमा बराबरी र एक खेलमा हारको नतिजासहित १५ अंक जोडेको थियो । 

दोस्रो स्थानको धनगढीले समान खेलबाट तीन जित, चार बराबरी र एक हारको नतिजासहित १३ अंक जोडेको थियो । धनगढीले एनएसएलको पहिलो संस्करणमा फाइनलसम्मको यात्रा तय गरे पनि काठमाडौं रेजर्ससँग पराजित भएपछि उपविजेतामा खुम्चिएको थियो ।

आजको खेलमा जित निकाल्ने टिमले फाइनलमा स्थान पक्का गर्ने छ । र, हार्ने टिमले भने दोस्रो प्लेअफको मौका पाउने छ ।

हार्ने टोलीले काठमाडौं रेजर्स र ललितपुर सिटी एफसीबीचको इलिमिनेटर विजेतासँग फाइनल प्रवेशका लागि पुनः प्रतिस्पर्धा गर्ने छ ।

तस्बिरहरू : हरिशजंग क्षेत्री/बाह्रखरी