काठमाडौं । साविक उपविजेता धनगढी एफसीविरुद्ध २–० को जित निकाल्दै झापा एफसी नेपाल सुपर लिग (एनएसएल) को शीर्ष चारमा उक्लिएको छ । 

त्रिपुरेश्वरस्थित दशरथ रंगशालामा सम्पन्न खेलमा झापालाई जित दिलाउन कप्तान अञ्जन विष्ट र समिरराज थोकरले गोल गरे । एनएसएलको दोस्रो संस्करणमा धनगढीको भने यो पहिलो हार हो ।

झापाले दुवै गोल दोस्रो हाफमा गरेको हो । ५३औँ मिनेटमा कप्तान अञ्जनले गरेको गोलबाट झापाले अग्रता बनाएको हो । छिरिङ लामाले राइट साइडबाट गरेको क्रसमा अञ्जनले हेडर गोल गरेका हुन् ।

यस्तै, ७७औँ मिनेटमा समिरराज थोकरले गोल गर्दै झापाको अग्रता दोब्बर बनाए । प्रदीप लामाले पेनाल्टी बक्सको लेफ्ट साइडबाट निकालेको पासलाई ओर्गे सान्चेजले ‘फर्स्ट टच’ पोस्टको दिशा दिएका थिए । तर, लाइनबाट समिरराजले बललाई जाली चुमाएपछि उनको नाममा गोल भएको हो ।

जितसँगै सात खेलबाट १० अंक जोडेको झापा तालिकाको चौँथो स्थानमा उक्लिएको छ । प्रतियोगितामा झापाको यो दोस्रो जित हो । 

झापासँगको हारले अन्तिम खेलअगावै प्लेअफमा पुग्ने धनगढीको लक्ष्य पूरा हुन पाएन । सात खेलबाट १२ अंक जोडेको धनगढी तालिकाको दोस्रो स्थानमा यथावत् छ । समान खेलबाट १४ अंक जोड्दै शीर्ष स्थानमा आसिन पोखरा थन्डर्सले भने प्लेअफमा स्थान निश्चित गरिसकेको छ । 

दशरथ रंगशालामा दुवै टिमले गोलका आधा दर्जनभन्दा धेरै अवसरको सदुपयोग गर्न सकेनन् । खेलको पहिलो मिनेटमा नै झापाले गोलको सुन्दर अवसर सदुपयोग गर्न सकेन । धनगढीका अहमद सिजाजीले खेलको सुरुआत गर्दै बल रोहन कार्कीलाई पास दिएका थिए । तर, रोहनले डिफेन्डर डियाग्ने फालोउलाई दिएको निकै कमजोर पास नियन्त्रणमा लिँदै झापाका प्रशान्त लक्षमले बल अघि बढाए । लक्षमले ओर्गे सान्चेजलाई पास दिए पनि १८ यार्ड बक्समा ‘चिप’ गर्ने उनको प्रयास राम्रो हुन नसक्दा बल बाहिरिएपछि झापाले अग्रता बनाउन सकेन ।

तेस्रो मिनेटमा धनगढीका अहमेद हिजाजीको प्रहार आकासिँदा झापाको खतरा टरेको थियो । अभिषेक गुरुङको पासलाई नियन्त्रणमा लिँदै आशिष चौधरीले १८ यार्ड बक्सभन्दा निकै परबाट प्रहार गरेका थिए । तर, आशिषले बलसँग ‘कन्ट्याक्ट’ सही गर्न नसक्दा उनको प्रहारलाई पेनाल्टी बक्सका अहमेद हिजाजीले नियन्त्रणमा लिँदै भली प्रहार गरे पनि बल आकासिएको हो ।

छैटौँ मिनेटमा लेफ्ट साइडमा झापाका आवास लामिछानेले क्लियर गर्न नसकेको बललाई अभिषेकले नियन्त्रणमा लिँदै प्रहार गरे पनि गोलकिपर स्टेफन कुपिकले खतरा टारे ।

२०औँ मिनेटमा झापाका गोलकिपर स्टेफन कुपिकले पुनः एकपटक टिमको खतरा टारे । रामचन्द्र वाजीले मध्यभाग बाट दिएको पास अघि बढाउँदै हिजाजीले पेनाल्टी बक्स बाहिरबाट गरेको सशक्त प्रहारलाई झापाका गोलकिपर कुपिकले मुस्किलले बचाएका थिए । कुपिकबाट रिबाउन्ड आए पनि सुमित श्रेष्ठले क्लियर गरे ।

२२औँ मिनेटमा धनगढीका कमल श्रेष्ठको फ्रिकिक झापाका गोलकिपर कुपिकले मुस्किलले जोगाए । अभिषेक गुरुङमाथि फाउल गरेपछि प्रशान्त लक्षमले फाउल गरेपछि लेफ्ट साइडमा पेनाल्टी बक्सभन्दा बाहिरबाट धनगढीले फ्रिकिकको अवसर पाएको थियो । जसमा कमलको प्रहारलाई कुपिकले पन्च गरि फ्याकिदिए ।

२४औँ मिनेटमा झापाले पुनः अर्को सुन्दर अवसर सदुपयोग गर्न सकेन । राइट साइडबाट लक्ष्मण रुचालले निकालेको क्रसलाई बक्सभित्रका सान्चेजले नियन्त्रणमा राख्न नसक्दा झापाले अवसर खेर फाल्यो ।

४१औँ मिनेटमा झापाका सान्चेजको प्रहारमा धनगढीको गोलकिपर मोहम्मद ताहा बाधक बने । प्रशान्त लक्षमले मिडफिल्डबाट गरेको ‘स्विच’ नियन्त्रणमा राख्दै राइट साइड पेनाल्टी बक्सभित्रबाट सान्चेजले गरेको सशक्त प्रहारलाई ताहाले विफल बनाए । सोही रिबाउन्डमा झापाका लक्ष्मण रुचालले ‘एक्रोबेटिक’ को प्रयास गरे पनि बलसँग ‘कनेक्ट’ गर्न सकेनन् ।

७०औँ मिनेटमा धनगढीका फोडे फोफानाको प्रयासलाई पुनः झापाका गोलकिपर कुपिकले विफल बनाए । लेफ्ट साइडबाट अभिषेक गुरुङले गरेको क्रसमा फोफानाको हेडरलाई कुपिकले बारबाट माथि फ्याकिदिएका थिए ।

७९औँ मिनेटमा धिरज थातलीले रातो कार्डको दर्शन गरेपछि झापा १० खेलाडीमा सीमित बनेको थियो । धिरजले धनगढीका साइमोन लिम्बुमाथि गरेको ट्याकलमा रेफ्री राम दासनले सोझै रातो कार्ड देखाएका थिए ।