काठमाडौं । ललितपुर सिटी एफसीविरुद्ध जित निकाले पनि स्पोर्टिङ इलाम डे मेची एफसीका लागि त्यो पर्याप्त थिएन । मंगलबार इलामले ललितपुरविरुद्ध १–० को जितसहित नेपाल सुपर लिग (एनएसएल)को दोस्रो संस्करण टुंग्यायो । 

यो जितले इलामको प्लेअफ समीकरणमा खास प्रभाव पारेन । इलाम आफ्नो अन्तिम खेलअगावै प्लेअफबाट बाहिरिने पहिलो टिम बनिसकेको थियो । तर, पूर्वेली क्लबसँगको हारले ललितपुरलाई भने ठूलै संकटमा धकेलेको छ । इलामसँग खेल्नुअघि ललितपुर प्रतियोगितामा अपराजित दुई टिममध्येको एक थियो ।

हारपछि ललितपुरलाई अन्तिम खेलमा जित्नै पर्ने दबाब थपिएको छ । ललितपुरले अब लिग चरणको अन्तिम खेलमा साविक विजेता काठमाडौं रेजर्सविरुद्ध खेल्नेछ । लिग चरण भए पनि दुवै टिमका लागि यो ‘नकआउट’ खेल बन्ने निश्चित छ । 

ललितपुर र काठमाडौंको समीकरण जस्तो भएपनि मंगलबारबाट एनएसएलको दोस्रो संस्करणमा इलामको यात्रा समाप्त भएको छ । एनएसएलको लिग चरण समाप्त हुन अब ६ खेलमात्र बाँकी छन् । अर्थात् अबको ६ खेलपछि इलामले दोस्रो संस्करणमा पाएको स्थान थाहा हुनेछ । 

पूर्वेली टिमको नतिजा आशाअनुरुपको हुन सकेन । इलामले टिमको कप्तानी जिम्मेवारी मार्की खेलाडी तथा राष्ट्रिय टिमबाट समेत खेलिसकेका गोलरक्षक विकेश कुथुलाई सुम्पिएको थियो । विकेश तीनै खेलाडी हुन्, जो अघिल्लो सिजन काठमाडौं रेजर्सले उपाधि जित्दा टोलीका कप्तान थिए । प्रतियोगिताको पूर्वसन्ध्यामा आयोजित पत्रकार सम्मेलनमा विकेशले यसपटक इलामबाट स्टार थप्ने योजना रहेको बताएका थिए । 

“गत सिजन काठमाडौंबाट स्टार जित्यौं । यस पटक इलामबाट पनि स्टार जित्ने लक्ष्य छ । इलामले मलाई रोजेकोमा प्रशिक्षक र क्लबलाई धन्यवाद । म क्लबको विश्वास फिर्ता गर्नेछु,” विकेशले भनेका थिए ।

तर, विकेशले भनेझै इलामले यसपटक स्टार थप्न त सकेन नै, खराब नतिजाका कारण टोली प्रतियोगिता जारी रहँदा नै प्लेअफमा पुग्न नसक्ने पहिलो टिम समेत बन्यो ।

कहाँ चुक्यो इलाम 
यसमा कुनै दुईमत छैन, एनएसएलको दोस्रो संस्करणमा इलाम सबैभन्दा रोमाञ्चक टिम थियो । प्रतियोगितामा वीरगन्ज र धनगढीविरुद्ध अग्रता जोगाउन नसक्दा हार बेहोर्नु नै इलामका लागि ‘टर्निङ’ प्वाइन्ट बन्यो ।

इलामले वीरगन्जविरुद्ध १–० को र साविक उपविजेता धनगढीविरुद्ध पहिलो हाफमै बनाएको २–० को अग्रता जोगाउन नसक्दा समान तीन अंक गुमाएको थियो । यी दुई खेलबाट ६ अंक पाएको भए इलामको स्थिति बेग्लै हुने थियो । 

“यस पटक एनएसएलले टिममा ६ जना विदेशी राख्न पाउने र पाँचजनालाई खेलाउन पाउने नियम ल्याएको थियो । तर, इलामले सायदै पाँच विदेशी खेलाडीलाई एकै खेलमा मैदान उतार्‍यो । हामी विदेशी खेलाडीमा चुक्यौं,” इलाम कहाँ चुक्यो ? भन्ने प्रश्नमा मुख्य प्रशिक्षक मेघराज केसीले यसरी सटिक प्रतिक्रिया दिए ।

स्पष्ट धारणा राख्ने केसीले इलाम विदेशी खेलाडीबाट पाउनसक्ने काम लिन नसकेको बताउँछन् ।

“हाम्रो आठवटै खेलमा नेपाली खेलाडीको प्रदर्शनमा खोट लगाउने ठाउँ खासै देख्दिन । जति विदेशी खेलाडीहरूबाट हामीले काम लिन सक्नुपर्थ्यो । त्यति हामीले लिन सकेनौँ,” उनले थपे ।

दोस्रो संस्करणमा इलाम 
एनएसएलको इलामको यो ‘डेब्यू’ सिजन हो । पहिलो संस्करणमा सात टिमले प्रतिस्पर्धा गर्दा इलाम अस्तित्वमा नै थिएन । 

त्रिपुरेश्वरस्थित दशरथ रंगशालामा जारी प्रतियोगितामा आठ खेलबाट आठ अंक जोडेको इलाम अहिलेलाई तालिकाको छैटौँ स्थानमा छ । इलामले आठ खेलमध्ये समान दुई खेलमा जित र दुई खेलमा बराबरीको नतिजा निकाल्दा चार खेलमा भने हार व्यहोरेको छ । 

प्रतियोगिताको उद्घाटन खेलमै इलाम साविक विजेता काठमाडौं रेजर्ससँग १–० ले पराजित भएको थियो । दोस्रो खेलमा झापा एफसीलाई १–० ले हराएको इलामले तेस्रो खेलमा बुटवल लुम्बिनी एफसीविरुद्ध २–१ को हार व्यहोर्‍यो । चौथो खेलमा पोखरा थन्डर्ससँग १–० को हार बेहोर्दा इलामले पाँचौँ खेलमा साविक उपविजेता धनगढी एफसीलाई २–२ को बराबरीमा रोकेको थियो । 

छैटौँ खेलमा वीरगन्ज युनाइटेड एफसीविरुद्ध २–१ को हार बेहोर्दा इलामले सातौँ खेलमा चितवन एफसीविरुद्ध गोलरहित बराबरी खेल्दै अंक बाँडेको थियो । र, अन्तिम खेलमा इलामले ललितपुरविरुद्ध १–० को जित निकाल्दै प्रतियोगिताको सुखद अन्त्य गर्‍यो ।