काठमाडौं । नेपाल सुपर लिग (एनएसएल)को दोस्रो संस्करणमा धनगढी एफसी र झापा एफसीबीचको पहिलो हाफ गोलरहित बराबरीमा सकिएको छ । 

त्रिपुरेश्वरस्थित दशरथ रंगशालामा जारी रोमाञ्चक खेलको पहिलो हाफमा दुवै टिमले प्राप्त अवसर सदुपयोग गर्न नसक्दा अग्रता बनाउन सकेनन् । खेलको पहिलो मिनेटमा नै झापाले गोलको सुन्दर अवसर सदुपयोग गर्न सकेन । 

धनगढीका अहमद सिजाजीले खेलको सुरुआत गर्दै बल रोहन कार्कीलाई पास दिएका थिए । तर, रोहनले डिफेन्डर डियाग्ने फालोउलाई दिएको निकै कमजोर पास नियन्त्रणमा लिँदै झापाका प्रशान्त लक्षमले बल अघि बढाए । 

लक्षमले ओर्गे सान्चेजलाई पास दिए पनि १८ यार्ड बक्समा ‘चिप’ गर्ने उनको प्रयास राम्रो हुन नसक्दा बल बाहिरिएपछि झापाले अग्रता बनाउन सकेन । तेस्रो मिनेटमा धनगढीका अहमेद हिजाजीको प्रहार आकासिँदा झापाको खतरा टरेको थियो । 

अभिषेक गुरुङको पासलाई नियन्त्रणमा लिँदै आशिष चौधरीले १८ यार्ड बक्सभन्दा निकै परबाट प्रहार गरेका थिए । तर, आशिषले बलसँग ‘कन्ट्याक्ट’ सही गर्न नसक्दा उनको प्रहारलाई पेनाल्टी बक्सका अहमेद हिजाजीले नियन्त्रणमा लिँदै भली प्रहार गरे पनि बल आकासिएको हो । 

छैटौँ मिनेटमा लेफ्ट साइडमा झापाका आवास लामिछानेले क्लियर गर्न नसकेको बललाई अभिषेकले नियन्त्रणमा लिँदै प्रहार गरे पनि गोलकिपर स्टेफन कुपिकले खतरा टारे । २०औँ मिनेटमा झापाका गोलकिपर स्टेफन कुपिकले पुनः एकपटक टिमको खतरा टारे । रामचन्द्र वाजीले मध्यभाग बाट दिएको पास अघि बढाउँदै हिजाजीले पेनाल्टी बक्स बाहिरबाट गरेको सशक्त प्रहारलाई झापाका गोलकिपर कुपिकले मुश्किलले बचाएका थिए । 

कुपिकबाट रिबाउन्ड आए पनि सुमित श्रेष्ठले क्लियर गरे । २२औँ मिनेटमा धनगढीका कमल श्रेष्ठको फ्रिकिक झापाका गोलकिपर कुपिकले मुश्किलले जोगाए । अभिषेक गुरुङमाथि फाउल गरेपछि प्रशान्त लक्षमले फाउल गरेपछि लेफ्ट साइडमा पेनाल्टी बक्सभन्दा बाहिरबाट धनगढीले फ्रिकिकको अवसर पाएको थियो । जसमा कमलको प्रहारलाई कुपिकले पन्च गरि फ्याकिदिए । 

२४औँ मिनेटमा झापाले पुनः अर्को सुन्दर अवसर सदुपयोग गर्न सकेन । राइट साइडबाट लक्ष्मण रुचालले निकालेको क्रसलाई बक्सभित्रका सान्चेजले नियन्त्रणमा राख्न नसक्दा झापाले अवसर खेर फाल्यो । ४१औँ मिनेटमा झापाका सान्चेजको प्रहारमा धनगढीको गोलकिपर मोहम्मद ताहा बाधक बने । 

प्रशान्त लक्षमले मिडफिल्डबाट गरेको ‘स्विच’ नियन्त्रणमा राख्दै राइट साइड पेनाल्टी बक्सभित्रबाट सान्चेजले गरेको सशक्त प्रहारलाई ताहाले विफल बनाए । सोही रिबाउन्डमा झापाका लक्ष्मण रुचालले ‘एक्रोबेटिक’ को प्रयास गरे पनि बलसँग ‘कनेक्ट’ गर्न सकेनन् । आज धनगढी जितसहित प्लेअफमा स्थान बनाउने लक्ष्यमा छ । यता, झापा भने जित निकाल्दै प्रतियोगिताको प्लेअफ सम्भावनालाई कायम राख्न चाहन्छ ।