काठमाडौं । त्रिपुरेश्वरस्थित दशरथ रंगशालामा बुधबार खेलपछि मैदान तनावपूर्ण बन्यो । जहाँ जितको दबाबबीच स्पोर्टिङ इलाम एफसी र वीरगन्ज युनाइटेड प्रतिस्पर्धामा उत्रिएका थिए ।

प्रतियोगिताको अन्तिम चार यात्रामा कायम रहन दुवै टिमलाई जित अनिवार्य थियो । दशरथ रंगशालामा सम्पन्न यो खेलमा वीरगन्जले बाजी मार्‍यो । १–० ले पछि परेको स्थिति उल्ट्याउँदै वीरगन्जले २–१ को जित पक्का गर्‍यो । प्रतियोगितामा वीरगन्जको यो पहिलो जित थियो । 

खेल इन्जुरी समयअघिसम्म सामान्य चल्दै थियो । तर, इन्जुरी समयमा रेफ्रीको एक निर्णयका कारण मैदानभित्रका खेलाडीमात्र नभई इलामेली डकआउट नै आक्रोशित बन्यो । इन्जुरी समयअघिसम्म खेल १–१ को बराबरीमा चल्दै थियो । तर, सात मिनेटको थप समयमा खेलका मुख्य रेफ्री कविन व्यञ्जनकारले वीरगन्जलाई पेनाल्टीको अवसर दिए ।

१८ यार्ड बक्सभित्र इलामका सुरज बस्नेतको ‘ह्यान्ड’ भएको भन्दै रेफ्री व्यञ्जनकारले पेनाल्टीको इसारा गरे । इलामेली टिमलाई आक्रोशित बनाउन यो पर्याप्त थियो । यो निर्णयप्रति तत्कालै कप्तान विकेश कुथुसहित खेलाडी व्यञ्जनकारमाथि खनिए । इलामेली टिममा कप्तान विकेश सबैभन्दा आक्रोशित र असन्तुष्ट देखिन्थे । यसैबेला रेफ्री व्यञ्जनकारले उनलाई पहिलो पहेँलो कार्ड देखाए । 

प्राप्त पेनाल्टीमा वीरगन्जका फरवार्ड विलियम ओपुकुले कुनै गल्ती गरेनन् । र, वीरगन्जलाई अग्रतामा राखे । यही गोल निर्णायक बनेपछि वीरगन्जले प्रतियोगितामा पहिलो पटक तीन अंक निश्चित गर्‍यो । जितसँगै पाँच खेलबाट पाँच अंक जोड्दै वीरगन्जले तालिकाको अन्तिम स्थान छाड्यो । ६ खेलबाट चार अंक जोडेको इलाम भने तालिकाको पुछारमा खस्कियो ।

खेलको अन्तिम ह्विसिल बजाएपछि मैदानको मध्यभागमा मुख्य रेफ्रीनजिक रहेका विकेशले व्यञ्जनकारको निर्णयप्रति तालि बजाउन सुरु गरे । विकेशको यो हर्कतमा रेफ्री व्यजनकारले दोस्रो पहेँलो कार्ड देखाउँदै रातो कार्ड देखाए । यसपछि विकेश झनै आक्रोशित बन्दै रेफ्रीलाई धकेले, सँगै इलामका सबै खेलाडी रेफ्रीमाथि खनिए । 

“खेलाडीले पेनाल्टीको कम्प्लेन गरिरहेका थिए । हाम्रो खेलाडी लडिरहेको बेलामा ह्यान्ड भएको हामीले देखेनौँ । त्यो बल पोस्टतिर गएको पनि थिएन, प्रहार पनि गरेका थिएनन् । त्यही बेला हाम्रो कप्तानले पहेँलो कार्ड पनि पाइसकेको थिए । खेलपछि रेफ्रीलाई तपाईंको निर्णय राम्रो भयो, मलाई अझै कार्ड देउभन्दा कार्ड देखाएपछि खेलाडी आक्रोशित भएका हुन्,” खेलपछिको घटनाबारे इलामका मुख्य प्रशिक्षक मेघराज केसीले शान्त शैलीमा जवाफ दिए ।

खेलपछि पत्रकारसँगको कुराकानीमा केसी खेलाडीजस्तै आक्रामक देखिएनन् । त्यसै पनि नेपाली प्रशिक्षकमध्ये केसी फरक स्वभावका कारण परिचित छन् । फुटबल र अनुशासनलाई सँधै एकसाथ रहनुपर्नेमा जोड दिने केसीले बुधबार पनि आफ्नो संयमता प्रस्तुत गरे । 

‘रेफ्री आज नेपालमा देखिएको सबैभन्दा खराब अवस्थामा थियो भन्न मिल्छ कि मिल्दैन’ ? भन्ने प्रश्नमा केसीले कूटनीतिक जवाफ दिए ।

“क्वालिटी कस्तो छ भन्ने कुरामा म रेफ्रीलाई मात्र दोष दिन्न । हाम्रो नेपाली फुटबलकै क्वालिटी कस्तो छ । खेलाडी र कोचको क्वालिटी कस्तो छ । त्यहीअनुसारको रेफ्रीको क्वालिटी छ । हामी सबै कुरामा पछि परेका छौँ । विश्वस्तरीय रेफ्री ल्याउन नेपाली फुटबलको स्तर कहाँ छ ? हामीले उनीहरूको ठाँउमा बसेर पनि हेर्नुपर्छ । नेपालको फुटबलअनुसार रेफ्रीहरू ठिकै छन् । गल्ती खेलाडी वा रेफ्रीमध्ये कसैको होला । तर, यी खेलाडी पनि हाम्रा र ती रेफ्री पनि हाम्रै हुन्,” केसीले यसरी परिपक्क जवाफ दिए ।

नेपाल सुपर लिग (एनएसएल)मा पनि हरेक खेलपछि रेफ्रीप्रति आफ्नो खरो निराशा पोख्नु सामान्य बनिसकेको छ । खेलपछि हारको जिम्मेवार नै रेफ्रीलाई देखाउन पछि पर्दैनन् । तर, रेफ्रीमाथि हातपात भने भएको छैन, अझ भनौ क्लबहरूले संयमता र मर्यादा भने उल्लंघन गरेका छैनन् । 

केसीले सुरुआतमै भने, “टिमले प्राप्त मौकाको सदुपयोग गर्न सकेन । हामी हारको कारण रेफ्रीलाई बनाउँदैनौँ ।” तर, उनले बुधबारको खेलमा रेफ्रीले नै अपशब्द प्रयोग गरेको भन्दै गुनोसो पोखे ।

“म रेफ्रीसँग थिए, उनले मुख छाडे । मैले भाइ तिमीले त यस्तो भन्न नहुने भन्दा उसले हामी कुटाइ खान आएको हो र भन्ने जवाफ दियो । खेलाडीले अपशब्द बोले रेफ्रीले कार्ड दिन सक्छ । रेफ्रीले नै मुख छाडेको विषयमा चाहिँ कसले कारबाही गर्ने ?,” केसीले प्रश्न तेर्साए ।