काठमाडौं । प्रतिनिधिसभाका सभामुख देवराज घिमिरेले संसद्लाई प्रभावकारी र गरिमा बढाउन संसद् सचिवालयले प्रभावकारी भूमिका निर्वाह गर्नुपर्नेमा जोड दिएका छन् ।

१७औँ संघीय् संसद सेवा दिवसका अवसरमा बिहीबार सिंहदरबारमा आयोजित कार्यक्रममा उनले विगतको समीक्षासहित आउँदा दिनमा संसद्लाई प्रभावकारी र गरिमा बढाउन संसद् सचिवालयले प्रभावकारी भूमिका निर्वाह गर्नुपर्नेमा जोड दिएका हुन् ।

उनले संघीय संसद् सचिवालयलाई प्रभावकारी बनाउन आफूले पनि प्रभावकारी भूमिका निर्वाह गर्ने बताए । संसद् सेवाको विशिष्ट कार्यप्रणालीले विधायिकीकार्य र संसदीय काम–कारबाहीमा अविच्छिन्न सहयोग पुगेको उनको भनाइ छ ।

कार्यक्रममा राष्ट्रियसभाका अध्यक्ष गणेशप्रसाद तिमिल्सनाले संघीय संसद्लाई प्रभावकारी बनाउन निजामती कर्मचारी ऐन, संघीय संसद्को सेवा ऐनलाई मिलाएर अघि बढ्नुपर्ने बताए । व्यक्ति नभई संस्थालाई केन्द्रित बनाएर काम गर्न उनले आग्रह गरे । संघीय संसद्ले प्रस्ताव गरेको बजेटलाई अर्थ मन्त्रालयले पारित गर्नुपर्नेमा उनले जोड दिए ।

कानुन, न्याय तथा संसदीय मामिलामन्त्री धनराज गुरुङले संसद् सचिवालयलाई प्रभावकारी बनाउन आफूले सक्दो काम गर्ने प्रतिबद्धता जनाए ।

कार्यक्रममा दीर्घसेवा पदक र खेलकुद प्रतियोगितामा विजयीलाई पुरस्कार प्रदान गरिएको थियोे । ०५८ मंसिर २८ गते संसद् सेवालाई निजामती सेवाबाट अलग गरी संसद् सेवा ऐन जारी भएको दिनको अवसर पारेर ०६३ मंसिर २८ गतेदेखि संसद् सेवा दिवस मनाइँदै आएको छ । हिमालयन टेली भ्वाइस