काठमाडौं । नेपाल लाइफ इन्स्योरेन्स कम्पनीले चालु आर्थिक वर्ष २०८०/८१ को असोज मसान्तसम्ममा ६९ अर्ब ६२ करोड रुपैयाँ बराबरको दाबी भुक्तानी गरेको छ । यस अवधिमा मृत्यु दाबी भुक्तानी बापत पाँच अर्ब ६८ करोड रुपैयाँ, परिपक्व दाबी भुक्तानी बापत १९ अर्ब ७८ करोड रुपैयाँ  र अग्रिम दाबी भुक्तानी बापत २३ अर्ब ४४ करोड रूपैयाँको दाबी भुक्तानी गरेको हो ।

असोज मसान्तसम्ममा १३ हजार ५१२ जनाका हकवालाहरूलाई मृत्यु दाबी भुक्तानी गरिसकेको कम्पनीले जानकारी दिएको छ । कम्पनीले ‘कन्भेन्सनल’ प्लान अन्तर्गत ११ शजार १७७ जनालाई तीन अर्ब ७१ करोड र वैदेशिक रोजगारीतर्फ दुई हजार ३३५ जनालाई एक अर्ब ९७ करोड रुपैयाँ भुक्तानी गरिसकेको छ ।  

यस कम्पनीले आफ्नो दाबीप्रक्रियालाई एकदम सहज बनाएको र दाबीका निम्ति कागजात प्राप्त हुने बित्तिकै कम्पनी भुक्तान गर्न तत्पर रहेको पनि बताएको छ । चालु आर्थिक वर्षको पहिलो त्रैमासमा कम्पनीलाई प्राप्त भएको मृत्यु दाबी भुक्तानी निवेदनमध्ये ९३ प्रतिशत दाबी फर्छ्योट भइसकेको कम्पनीले जनाएको छ ।

सम्पूर्ण कागजात प्राप्त भएमा दुर्घटना खण्डमा मृत्यु दाबी भुक्तानी तीन कार्य दिनभित्र र सामान्य मृत्यु दाबी भुक्तानीे ७ कार्य दिनभित्र नै भुक्तानी गर्ने कम्पनीले प्रबन्ध मिलाएको जानकारी दिएको छ ।  अवधिमा ४६ प्रतिशत मृत्यु दाबी भुक्तानी तीन दिन भित्र गरेको छ । यसै गरी ६७ प्रतिशत निवेदन एक हप्ता भित्र र ८१ प्रतिशत मृत्यु दाबी भुक्तानी एक महिना भित्र कम्पनीले गरेको छ ।

कम्पनी १०० प्रतिशत दाबीयथाशिघ्र भुक्तानी गर्न तत्पर रहेको तर आवश्यक कागजातहरू समयमा उपलब्ध नहुँदा केहि दाबी भुक्तानी गर्न ढिलाई भएको बताइएको छ ।

नेपाल लाइफ इन्स्योरेन्स कम्पनीले मृत्यु दाबी भुक्तानी गर्नका लागि आफ्नो आन्तरिक प्रणालीहरूलाई सुदृढ तथा प्रविधिमैत्री बनाएको छ । यसै क्रममा यस कम्पनीले आधुनिक प्रविधिको उच्चतम प्रयोग गर्दै न्यूनतम समयमा मृत्यु दाबी भुक्तानी गर्ने प्रबन्ध मिलाइएको कुरा यस कम्पनीका प्रमुख कार्यकारी अधिकृत प्रवीण रमण पराजुलीले बताए ।

आर्थिक वर्ष २०७९/८० मा ९९.१३ प्रतिशत मृत्यु दाबी भुक्तानी गर्दै नेपाल लाइफ सर्वाधिक मृत्यु दाबी भुक्तानी गर्न सफल भएको कम्पनीको दाबी छ । आर्थिक वर्ष २०७८/७९ मा कम्पनीले ९९.०७ प्रतिशत मृत्यु दाबी भुक्तानी गरेको थियो ।