site stats
बाह्रखरी :: Baahrakhari
खेल
Global Ime bankGlobal Ime bank
नेपाल सुपर लिग : मैदानमा दुई इलाम !

काठमाडौं । यकिन तथ्यांक त छैन तर नेपाल सुपर लिग (एनएसएल) को दोस्रो संस्करणमा सबैभन्दा धेरै गोलका अवसर गर्ने क्लब नै मुख्य प्रशिक्षक मेघराज केसीको टिम हो । मेघराज केसी अर्थात् पूर्वेली टोली स्पोर्टिङ इलाम डे मेची एफसी ।

एनएसएलको दोस्रो संस्करणमा सबैभन्दा रोमाञ्चक टिम नै इलाम भन्दा फरक पर्दैन । परोस् पनि कसरी ? प्रदर्शन हेर्दा लाग्छ, इलामले सायदै हार्छ । तर, नतिजा भने बिल्कुल फरक छ । दोस्रो संस्करणमा चार खेल खेलिसक्दा इलामले एकपटक मात्र जितको स्वाद चाखेको छ ।

चार खेलमै इलामको प्रदर्शन कमजोर टिमको जस्तो छैन । सन् २००८ देखि २०१४ सम्मै स्पेनको टोली यस्तै थियो । हारे पनि स्पेनको प्रदर्शनमा प्रश्न उठाउने मुस्किलले भेटिन्थे । अहिले इलाम त्यस्तै छ, नतिजा सन्तोषजनक नभए पनि प्रदर्शनले मन जितिरहेको छ ।

pokhara-1701868320.jpg

मैदानमा दुई इलाम !

एनएसएलको आफ्नो चौथो खेलमा बुधबार इलामले पोखरा थन्डर्सविरुद्ध १–० को हार बेहोर्‍यो । खेलको ४७औँ मिनेटमा पोखराका सञ्जीव विष्टले गरेको गोल इलामलाई निराश बनाउन पर्याप्त रह्यो । 

यो खेलमा पनि इलामेली टिम सदाझैँ विकेश कुथुको कप्तानीमा मैदान उत्रिएको थियो । तर, मैदानमा दुईवटा इलाम देखिए । पोखराविरुद्ध पहिलो हाफको इलाम र १५ मिनेटको ‘ब्रेक’ पछि आएको दोस्रो हाफको इलाम बिल्कुलै फरक थियो । पहिलो हाफमा मैदानमा पोखराका खेलाडी मुस्किलले बल नियन्त्रणमा राख्न सफल हुन्थे । 

एनएसएलको आधिकारिक तथ्यांकले नै पहिलो हाफमा इलामले नौ आक्रमण बुनेको देखाएको थियो । जसमध्ये तीनवटा प्रहार जालीमै लक्षित रह्यो । 

छैटौँ मिनेटमा इब्राहिम जितेको क्रसमा ओमार थिओमको हेडर क्रसबाट बाहिरियो । २९औँ मिनेटमा अमाथ ड्वले मैदानको मध्यभागबाट एक्लै अघि बढाउँदै निकालेको ‘थ्रू’ बललाई पेनाल्टी बक्सभित्रबाट फोडे कामाराले ‘फर्स्ट टच’ प्रहार गरे पनि सेकेन्ड बार नजिकैबाट बाहिरियो । पहिलो हाफको अन्तिम मिनेटमा इलामका ओमार थिओमले बक्सबाहिरबाट गरेको सशक्त सोझो प्रहार गुइलियम प्रिसोले सहजै बचाउँदै पोखराको खतरा टारेका थिए । यी सबै पहिलो हाफमा इलामले पोखराविरुद्ध बनाएका आक्रमणको केही उदाहरणमात्र हुन् ।

४५ मिनेटसम्म दर्शकलाई हौसला दिनसक्ने आक्रमण पोखराले बुन्नै सकेन । हुन त इलामले हालसम्म निरश प्रदर्शन गरेको छैन । तर, पोखराविरुद्ध पहिलो हाफको प्रदर्शन अझ उम्दा थियो । तर, खोट भने पुरानै, ‘फाइनल थर्ड’ को प्रभावविहीन ‘फिनिसिङ’ ।

दोस्रो हाफमा बिल्कुलै अलग । पोखराले इलामको स्वरूप लिँदा इलाम भने पहिलो हाफको पोखराको स्वरूप लियो । अच्चमै लाग्ने गरी इलामको प्रदर्शन बद्लियो । अनि त्यसै गरी पोखराको पनि । 

फुटबलमा एउटा अवसरको सदुपयोग नै जित र हारको साँघुरो अन्तर बनेका धेरै उदाहरण छन् । पहिलो हाफमा रवाफपूर्ण दबाबमा राखेको इलामले दोस्रो हाफमा पोखराबाट चर्को दबाब बेहोर्‍यो । पोखराले त्यही एक अवसरको सदुपयोग गर्‍यो ।

Ilam_pokhara-1701864535.jpg

“दोस्रो हाफको सुरुआतमै उनीहरूको स्कोर निस्कियो । उताको स्कोर आउँदा हाम्रो टिमको खेलाडीलाई गोल हान्न हतार भयो । एउटा सिस्टममा खेलेर कम्बिनेसन मिलाउँदै अवसरहरू बनाएका थियौँ, त्यो भन्दा सबैलाई गोल हान्न हतार भयो । यही हतारोले दोस्रो हाफमा खेल खस्किएको देखियो,” हारपछि दोस्रो हाफको प्रदर्शनबारे इलामका प्रशिक्षक केसीले यसरी स्पष्ट पारे ।

दोस्रो हाफमा इलामका खेलाडीलाई पोखराले बल नियन्त्रणमा राख्ने अवसर नै दिएन । पाएका अवसरमा पनि इलामेली टोलीले खेल नियन्त्रण गर्ने मनसाय देखाएन ।

खेल समाप्त हुँदा एनएसएलको तथ्यांकअनुसार पोखराले दोस्रो हाफमा पाँच आक्रमण बनायो । जसमध्ये दुई लक्ष्यमा थिए । त्यसमध्ये पनि एउटा आक्रमणले जाली चुम्यो । यही एउटा गोलले तीन अंक दिलाउन पोखरा शीर्ष स्थानमा उक्लियो । चार खेल खेलेको पोखराको खातामा आठ अंक छ ।

‘गेम चेन्जर आयुश’

दोस्रो हाफको सुरुआतमै पोखराले सुन्दर अवसरमा अग्रता बनाउन सकेन । लेफ्ट साइडमा सञ्जीव विष्टको पासलाई नियन्त्रणमा लिँदै पेनाल्टी क्षेत्रबाट मोसेस त्वमले गरेको सशक्त प्रहार पोस्टमा लागेर घुम्दा इलामको गोललाइनबाट बाहिरिएको थियो । त्यसको अर्को मिनेटमा नै पोखराले अग्रता बनायो ।

पोखराका लागि गोल सम्भव बनाउने खेलाडी थिए, आयुश घलान । ‘मार्की’ खेलाडीसमेत रहेका आयुश टिमको पहिलो रोजाईमा थिएनन् । दोस्रो हाफमा प्रवेश लगत्तै आयुशले आफू किन ‘मार्की’ भएको पुष्टि गरे । ४७औँ मिनेटमा आयुशकै कर्नरलाई सञ्जीवले पोस्टको दिशा दिएका थिए ।

Ilam_Pokhara1-1701868708.jpg

“मुख्य भनेको हाम्रो खतरा खेलाडी आयुश घलान । उनी छिर्नेबित्तिकै हाम्रो टिम चेन्ज भइहाल्यो । पहिलो हाफमा बल राख्ने मान्छे थिएन । त्यसपछि आयुश घलान गए, सेट पिसमा हामीले गोल पनि निकाल्यौँ । इलाम अत्तालिन थाल्यो । उनीहरूको आन्तरिक द्वन्द सुरु भयो । यसले हामीलाई जित्न सहज बनायो,” पोखराका सहायक प्रशिक्षक राजेन्द्र तामाङले टिमका मुख्य खेलाडी आयुश घलानको प्रशंसामा शब्द खर्चिन पछि परेनन् ।

तर, सहायक प्रशिक्षक तामाङ पनि मान्छन्– पहिलो हाफमा इलामले चर्को दबाब दियो । त्यसैले तामाङले पहिलो हाफमा इलाम हरेक पक्षमा राम्रो भएको भन्न हिचकिचाएनन् ।

“पहिलो हाफ राम्रो भएन । हामी एक–अर्कासँगै बहस गर्न थाल्यौँ । इलामले हामीलाई दबाब दिएको दियै गर्‍यो । उनीहरूको बल पोसेसन पनि राम्रो थियो । आक्रमण पनि राम्रो थियो । हरेक पक्ष राम्रो थियो,” तामाङले थपे ।

प्रकाशित मिति: बिहीबार, मंसिर २१, २०८०  ०६:४५
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro