काठमाडौं । अख्तियार दुरुपयोग अनुसन्धान आयोगले काभ्रेपलाञ्चोकको धारापानी हिले सामुदायिक वन उपभोक्ता समूहका अध्यक्ष चन्द्रसिंह लामासमेत तीनजनामाथि भ्रष्टाचार मुद्दा दायर गरेको छ ।

उनीहरूले ९ लाख १३ हजार २८० रुपैयाँको सार्वजनिक सम्पत्ति हानी नोक्सानी गरी भ्रष्टाचार गरेको ठहर गर्दै अख्तियारले बुधबार विशेष अदालत काठमाडौंमा मुद्दा दायर गरेको हो । 

अख्तियारले मुद्दा दायर गरेका अन्यमा धारापानी हिले सामुदायिक वन उपभोक्ता समूहका सचिव संगीता चौलागाईं र कोषाध्यक्ष माधवप्रसाद चौलागाईं रहेका छन् । दायर गरिएको मुद्दामा उनीहरूसँग ९ लाख १३ हजार २८० रुपैयाँ बिगो दाबी गरिएको छ । 

समूहका अध्यक्ष समेतले हिसाब किताब नदेखाएको, समितिको साधारणसभा पनि नबसी आफू खुसी समूहको रकम खर्च गरी रकम हिनामिना गरेको भन्ने उजुरी परेपछि अख्तियारले अनुसन्धान सुरु गरेको थियो । 

अनुसन्धान हुँदा उनीहरूले आपसी मिलोमतोमा संयुक्त दस्तखतबाट उपभोक्ता समूहको बैंकमा रहेको खाताबाट बदनियत राखी ९ लाख १३ हजार २८० रुपैयाँ हिनामिना गरेको पाइएको अख्तियारले जनाएको छ ।