![चारदेशीय शृंखलाका लागि आज हङकङ जाँदै नेपाली राष्ट्रिय महिला क्रिकेट टिम](https://12khari.top/uploads/posts/Nepali-mahila-Cricket-Team-1699758054.jpg)
काठमाडौं । हङकङमा हुने चारदेशीय शृंखलाका लागि नेपाली राष्ट्रिय महिला क्रिकेट टिम आज (आइतबार) त्यसतर्फ प्रस्थान गर्दै छ ।
कात्तिक २९ गतेदेखि सुरु हुने शृंखलाका निम्ति नेपाली टिम दिउँसो ३ः४५ मा हङकङ उड्ने नेपाल क्रिकेट संघ (क्यान)ले जनाएको छ ।
शृंखला कात्तिक २९ देखि मंसिर ३ गतेसम्म सञ्चालन हुनेछ । शृंखलाका सबै खेल हङकङ क्रिकेट क्लबको मैदानमा आयोजना गरिएको छ ।
प्रतियोगिताको शीर्ष दुई टोली उपाधिका निम्ति भिड्नेछन् । पुछारका दुई टोलीले भने तेस्रो स्थान पाउन प्रतिस्पर्धा गर्नेछन् ।
शृंखलाको पहिलो खेलमा नेपालले तान्जेनियाको सामना गर्नेछ । नेपाल र तान्जेनियाबीचको खेल कात्तिक २९ गते हुनेछ ।
नेपालले कात्तिक ३० गते आयोजक हङकङ र मंसिर २ गते जापानको सामना गर्नेछ । तान्जेनिया र जापान नेपालसामु नयाँ प्रतिद्वन्द्वी हुन् ।