काठमाडौं । क्रिकेटर सन्दीप लामिछानेविरुद्धको नाबालिग बलात्कार मुद्दा बिहीबार न्यायाधीश केशवप्रसाद घिमिरेको इजलासमा परेको छ ।

सो मुद्दामा चाँडो सुनुवाइ गर्न सर्वोच्च अदालतको निर्देशनात्मक आदेश भए पनि काठमाडौं जिल्ला अदालतमा पटक–पटक पेसी स्थगित हुँदै आएको थियो ।

जिल्ला न्यायाधीश घिमिरेको इजलासमा सन्दीपविरुद्धको मुद्दा आज पाँचौँ नम्बरमा छ । गएको असोजमा सन्दीपविरुद्धको मुद्दाको सुनुवाइ तीनपटक स्थगित भएको थियो । असोज १, ७ र २५ गते सुनुवाइ स्थगित भएको थियो । अदालत प्रशासनले तीनपटक नै न्यायाधीश अभावलाई कारणका रूपमा प्रस्तुत गरेको थियो ।

बलात्कार भएको हो/होइन भन्ने विवादको यो मुद्दामा सन्दीप पक्षले बालिकाको उमेरमा प्रश्न उठाउँदै जन्ममिति यकिन गर्न माग गर्दै आएको छ । सामान्यतः नागरिकतामा उल्लेख जन्ममिति मान्ने अभ्यास छ । तर, न्यायाधीशबाट पटक–पटक बालिकाको जन्ममिति यकिन गर्ने आदेश भएका छन् ।

साउन ३२ गते जिल्ला अदालतका तत्कालीन एक नम्बर न्यायाधीश राजुकुमार खतिवडाको इजलासले पीडितकी आमाको जन्ममिति यकिन गर्ने आदेश दिएको थियो ।

त्यस बेला राष्ट्रिय क्रिकेट टिमका कप्तान रहेका सन्दीपविरुद्ध ०७९ भदौ २१ गते एक किशोरीले जबरजस्ती करणी गरेको भन्दै गौशाला प्रहरी वृत्तमा जाहेरी दिएकी थिइन् ।