काठमाडौं । प्रधानन्यायाधीश विश्वम्भरप्रसाद श्रेष्ठले मुलुकको विकास तथा न्यायपूर्ण समाज बनाउन चाडपर्वबाट महत्त्वपूर्ण आधार प्राप्त हुने बताएका छन् । दसैँ, तिहार तथा छठ पर्वको अवसरमा शुभकामना दिँदै उनले चारडपर्वले न्यायपूर्ण समाजको भावना विकास गर्ने बताए ।

सांस्कृतिक धरोहर र वैभवको रूपमा रहेका यी चाडपर्वहरूमा अन्तर्निहित भावना र सन्देशबाट मुलुकको विकास, समृद्धि, सुशासन तथा न्यायपूर्ण समाजको स्थापनाको लागिसमेत महत्त्वपूर्ण आधार प्राप्त हुने विश्वास व्यक्त गर्दछु,” उनले सन्देशमा भनेका छन् ।

उनले २०८० सालको विजयादशमी, शुभ–दीपावली, नेपाल संवत् र छठ पर्वलगायतका चाडपर्वहरूको उपलक्ष्यमा स्वदेश तथा विदेशमा रहने सम्पूर्ण नेपाली दिदीबहिनी तथा दाजुभाइमा शुभकामना व्यक्त गरेका छन् ।

“सत्य, प्रकृति, सदाचार र शक्तिको प्रतीकका रूपमा रहेका यी चाडपर्वहरूले मुलुकमा आइपर्ने सबै किसिमका विपत्ति र प्रतिकूलताहरूको सामना गर्ने सामर्थ्य प्रदान गर्ने छन् भन्ने मङ्गल कामनासहित २०८० सालको विजयादशमी, शुभ–दीपावली, नेपाल संवत् तथा छठ पर्वलगायतका चाडपर्वहरूको यहाँहरू सबैमा पुनः हार्दिक शुभकामना व्यक्त गर्दछु,” उनले भनेका छन् ।