काठमाडौं । हाल सञ्चालित २० वाणिज्य बैंकमध्ये अधिकांशले कात्तिकका निम्ति ब्याजदर घटाएका छन् । वाणिज्य बैंकले कात्तिकमा ११ प्रतिशतसम्म ब्याज दिने भएका हुन् । असोजमा व्यक्तिगत मुद्दती खातामा ११.३६ प्रतिशतसम्म ब्याज दिएका थिए ।

कात्तिकमा ब्याजदर बढाएका एनएमबि र नेपाल एसबिआई बैंकले पनि ११ प्रतिशतसम्म ब्याज दिने भएका छन् । यी दुई बैंकले असोजमा व्यक्तिगत मुद्दतीमा १० प्रतिशतभन्दा कम ब्याज दिएका थिए ।

वाणिज्य बैंकले असोजको तुलनामा कात्तिकमा मुद्दती निक्षेपमा औसत ०.२९९ प्रतिशत विन्दुले ब्याजदर घटाएका छन् । असोजमा वाणिज्य बैंकले औसत १०.२६ प्रतिशत ब्याज दिएका थिए । कात्तिकमा २० वाणिज्य बैंकको औसत ब्याजदर ९.९६ प्रतिशत छ ।

कात्तिकमा चार बैंकको ब्याजदर भने स्थिर छ । ब्याजदर स्थिर राख्नेमा लक्ष्मी सनराइज, राष्ट्रिय वाणिज्य बैंक, माछापुच्छ्रे र सिद्धार्थ बैंक छन् । माछापुच्छ्रे र सिद्धार्थ बैंकले असोजमा पनि ब्याजदर स्थिर राखेका थिए । यी चार बैंकले असोजमा व्यक्तिगत मुद्दतीमा ९.९९ प्रतिशत ब्याज दिएका थिए । कात्तिकमा पनि सोही दरमा ब्याज दिने भएका हुन् ।

ब्याजदर सार्वजनिक गरेका वाणिज्य बैंकमध्ये १४ वटाले ब्याजदर घटाएका छन् । एनएमबि र नेपाल एसबिआई बैंकले भने बढाएका हुन् ।

कात्तिकमा सबैभन्दा बढी एनएमबि, एनआइसी एशिया र नेपाल एसबिआई बैंकले व्यक्तिगत मुद्दती खातामा अधिकतम ११ प्रतिशत ब्याज दिनेछन् । नेपाल बैंक, सानिमा, प्रभु, एभरेस्ट र स्ट्यान्डर्ड चार्टर्ड बैंकले ९.२२ प्रतिशत ब्याज दिनेछन् ।